سرلیکنه
رسنیو په وار وار لیکلي چې ولس نور په اشرف غني او د هغه پر حکومت باور له لاسه ورکړی دی. خو بیا هم اشرف غنی په دې بې باوره حکومت کې له عبدالله او عطا نور سره ښکر اړم کړي دي؛ نامشروع حکومت ته د مشروعیت نوم ورکوي.
تېره ورځ اشرف غني د امریکا له سي بي ایس ټلوېزون سره په مرکه کې ویلي دي چې اوس په افغانستان کې جنګ د خلکو پر ضد بڼه غوره کړې ده. له دې دا څرګنده شوه چې دا ۱۷کاله د حکومت پر خلاف و، نور حکومت له منځه تللی دی او جګړه د خلکو پر خلاف روانه ده.
روانه جګړه هیڅ وخت د خلکو یا ولس پر خلاف نه ده، بلکې پر ولس له بهره جګړه تپل شوې ده. ولس له خپلې خاورې، مقدساتو او ملي ارزښتونو دفاع کوي، د بهرنیو یرغګرو په مقابل کې مقاومت کوي، په خپل ایماني قوت او افغاني غیرت د بهرنیانو تر وتلو پورې د جګړې پر دوام باور لري او تر کاملې ازادۍ پورې به مقاومت ته دوام ورکوي.
اشرف غني چې د حکومت له پیله یې رښتیا نه و ویلي تېره ورځ له سي بي ایس ټلوېزون سره په مرکه کې رښتیا خبره وکړه، ویې ویل چې د امریکا مرستې راسره نه وي، پر حکومت د ۳ ورځو د پایښت باور هم نه لرم.
د اشرف غني په دې وینا کې چې “موږ د امریکا له مرستو پرته شپږ میاشتې هم خپل ځواکونه نه شو تمویلولای،”همدا راز پروت دی چې حکومت یې پر ولس نه، بلکې یواځې او یواځي پر امریکا تکیه لري، څه وخت چې امریکا ترې لاس واخیست، حکومت به یې نسکور وي.
اشرف غني باید د ولس رایو، مقاومت، غیرت او مبارزې ته درناوی ولري، ورته تسلیم شي؛ د امریکا په میلیاردي مرستو د شپږو میاشتو باور نه لري، خو په دې باور لري چې ولس په تش لاس تر وروستۍ سلګۍ پورې خپل سپېڅلې مقاومت ته دوام ورکوي.
دویمه خبره چې اشرف غني په وینا کې کړې ده تر لومړۍ خبرې زیاته ارزښتناکه ده، ویلي یې دي: په افغانستان کې د حکومت پر خلاف ۲۱ ډلې فعالیت کوي، ځانمرګي روزي او موږ محاصره یو.
دا یې هم رښتیا ویلي، خو یواځې اشرف غني او د هغه ارګ محاصره دي، ولس ازاد دی، ځکه خو خپل مقاومت ته دوام ورکوي.
امریکا تل په افغانستان کې په خپل لاس له جوړ حکومت، ګاونډیانو او د سیمې له هېوادونو سره دوه مخې پالیسي غوره کړې ده. ټرمپ پاکستان ته په ګوتڅنډنه وايي چې له افغانستانه لاس واخلي، وسله وال دې نه ورلېږي. سپینه ماڼۍ وايي د افغانستان په سوله کې د پاکستان همکاري اړینه ده، خو په کابل کې د امریکایي پوځونو قوماندان، نیکولسن، بیا وايي چې پر پاکستان دې فشار زیات شي څو افغانستان له موجوده حالته (جنګ) وژغورل شي.
اشرف غني په خپل حکومت تر ۳ ورځو د پایښت باور نه لري، جان نیکولسن ورته ډاډ ورکوي، وايي طالبان دې وسله پر ځمکه کېږدي.
که نیکولسن حقیقت ووایي، اشرف غني ته باید د حکومت د پرېښودلو سپارښتنه وکړي او طالبانو (ولس) ته تسلیم شي، ځکه ولس د بهرنیو پوځونو په مقابل کې تر وروستیو سلګیو پر ځان د مقاومت باور لري، خو په اشرف غني باور نه لري؛ ځکه اشرف غني په حکومت باور نه لري.
