(کابل ټکی کام، ۱۳۹۶، مرغومی ۳۰) د امريکا دفاع وزير جېمز متيس، د متحده ايالاتو د ملي دفاعي ستراتيژۍ د اعلانولو پر مهال وويل، چې اوس مهال امريکا ته د ترهګرۍ پرضد جګړه مهمه نه ده، بلکې د نړۍ له سترو قدرتونو سره سيالي لومړيتوب لري.
هغه زياته کړه: “موږ به د ترورېزم پر ضد کمپاین ته چې نن په کې ښکېل یوو، دوام ورکړو، خو اوس د ستر ځواک سیالي د امریکا د ملي امنیت د تمرکز اصلې ټکی دی، نه ترورېزم”.
نوموړي په ښکاره ډول روسيه تورنه کړه چې د نږدې ګاونډيو هېوادونو له پولو يې سرغړونه کړې او زياته يې کړه چين غواړي له اقتصادي لارو خپل ګاونډيان ووېروي او دغه هېواد د جنوبي سمندر سيمې ته د پوځي بڼې ورکولو په هڅه کې دی.
متېس، چين او روسيه د امریکا لپاره ګواښ وباله او په خبره يې “هغه څوک چې مونږ ته ګواښېږي يوه ورځ به د هغوی لپاره خطرناک ثابت شي. ”
له بله پلوه چين او روسيې هم د امریکا د ملي دفاع ستراتیژۍ پر اعلان توند غبرګون ښودلی.
د روسيې د بهرنيو چارو وزير سرګي لاوروف ويلي، امريکا غواړي خپله مشري د زور له لارې ښکاره کړي او چين بيا وايي چې امريکا لا هم د سړې جګړې خيالونه ويني.
دا لومړی ځل دی، چې امريکا د نړيوالو قدرتونو پرضد د خپل ځواک اعلان کوي.
تر دې مخکې يو شمېر شنونکو او د افغانستان پخواني ولسمشر حامدکرزي ويلي و، چې امريکا او ځينې ګاونډي هېوادونه غواړي، څو افغانستان د خپلو سياليو په ډګر بدل کړي.
روسيه تور پورې کوي، چې افغانستان کې امريکا داعش وسله والو ته وسلې ورکوي او د هغوی مالي ملاتړ کوي.
له بلې خوا پر ايران او روسيې هم تورونه پورې کېږي چې وسله والو طالبانو ته نظامي تجهيزات چمتو کوي، خو دغه تورونه په ورا وار د روسيې او ايران له خوا رد شوي دي.
د شنونکو په باور، نړيواله ټولنه د ترهګرۍ د له منځه وړلو په اړه خپلمنځي يووالی نه لري زياتوي چې ځينې هېوادونه د ترهګرۍ پر ضد جګړه پر مخ وړي، خو يو شمېر نور بيا د ترهګرو تر څنګ ولاړ دي.
د افغانستان لپاره د امريکا د نوې تګلارې سره روسيې، چين، ايران او پاکستان مخالفت وکړ او ويلي يې و چې د افغانستان لانجه د پوځي اقداماتو پر مټ نه شي هوارېدلی.
