(کابل ټکی کام ۱۳۹۶ سلواغه ۲۱ فرید افغان)
په داسې حال کې چې د حکمتیار پلویان او نوموړي ته نږدې خلک تل په هغو بریدونو نیوکه کوي چې د طالبانو له خوا پر پر امریکایي ځواکونو او یا هم د هغوی له ملاتړ برخمنو افغان عسکرو باندې ترسره کیږي، چې آن حکمتیار یې هم په ځینو مواردو کې غندنه کړې، خو په یو تازه تحول کې حکمتیار د تیر جهادي بهیر یاد راژوندی کړی او دې بریدونو ته یې د جواز حکم ورکړی دی.
حکمتیار آریانا نیوز ته ویلي؛ ‹‹ټول هغه بریدونه، چې په کې د بېګناه او بې وسلې خلکو وژل مقصود وي حرام دي، اسلام رد کړي او مونږ یې هم په سختو ټکو کې غندو››.
او زیاتوي چې “ استشهادي بریدونه، چې موخه یې عام وګړي نه وي په اسلام کې سپیڅلي دي.“
حکمتیار د خبریال د دې پوښتنې په ځواب کې چې په اصطلاح انتحاري بریدونه کومه شرعي بڼه لري وویل؛
تاسې وایئ انتحاري؛ خو مونږ وایو استشهادي؛ انتحاري هغه بریدونه دي، چې یو چاته ژوند تریخ شوی وي او له ژوندانه تېریږي او ځانوژنه کوي- انتحاري یعنې ځانوژنه. استشهادي هغه بریدونه دي، چې په کې مړه کیدل حتمي او سل په سلو کې یقیني وي؛ خو البته سپیڅلو موخو ته. مونږ له دې بریدونو بشپړ ملاتړ کوو“‘
حکمتیار وویل؛ وسلوال مخالفین د دولت په دننه کې پراخ نفوذ لري او په وینا یې چې وسلوال بریدګر د لوړ پوړو امنیتي ځواکونو په موترو کې رالیږدول کیږي او موخې ته هم په وسلوال پوځ کې د نفوذي کسانو لخوا رسول کیږي.
د یادونې وړ ده چې طالبانو تل ویلي چې استشهادی یا سرتیري بریدونه داسې ځای کې کوي چې ملکي وګړو ته هیڅ زیان نه وي او زیان یې یواځې مقابل لوري ته ورسیږي.
طالبانو همداراز په افغان ځواکونو په ځلونو غږ کړی دی چې د امریکایانو له لیکو رابیل شي، او پرې دې ګدي چې دوی مخامخ له نړیوالو ځواکونو سره وجنګیږي .
حکمتیار همداراز د ملي یووالي دحکومت پر اداره هم نیوکې کړې او هغه یې ناکامه بللې ده
