عطانور په شپاړلس ولايتونو کې د لاريونونو خبرداری ورکړ
(کابل ټکی کام، ۱۳۹۶، سلواغې ۲۳) له تېرو نېږدې دوو مياشتو راهيسې د ارګ- جمعيت ګوند او عطامحمد نور تر منځ د بلخ ولايت او د جمعيت ګوند او حکومت تر منځ پر حکومت کې د ونډې پر سر لس ځلې ناستې شوي، خو هيڅ نتيجه يې نه ده ورکړې.
د بلخ د والي وياند منير فرهاد وايي، عطامحمد نور تېره ورځ په مزارشريف ښار کې خپلو پلويانو ته د خبرو پر مهال وويل چې په راتلونکو څو ورځو کې به د هېواد په شپاړلس ولايتونو کې لاريونونه وکړي.
نوموړی وايي، د جمعیت ګوند د پلويانو د دغو لاريونونو موخه په حکومت باندې فشار راوړل دي تر څو يې غوښتنې ومنل شي.
عطامحمد نور په خپلو خبرو کې يو ځل بيا پر دې ټينګار وکړ، چې د جمعيت ګوند غوښتنې بايد ومنل شي او زياته يې کړه چې خپلې غوښتنې به کمې نه کړي.
جمعیت ګوند ګډ حکومت ته دوولس مادهییزه طرحه سپارلې چې مهمې غوښتنې يې پکې، د اساسي قانون د تعدیل د کمېسیون جوړیدل، د لویې جرګې رابلل، د توشیح شوي قانون له مخې د تذکرو ویش، په حکومت کې د جمعیت ونډه، په ملي شورا کې د ګوندونو ونډه او بلخ ولايت عطامحمد نور ته سپارل دي.
نږدې دوه مياشتې مخکې ارګ اعلان وکړ چې د عطانور استعفا يې منلې او پر ځای يې انجينير داود ټاکلی، خو نور د ولسمشرۍ ماڼۍ پريکړه ونه منله او وايي چې اوس هم د بلخ والي دی او په عادي توګه خپل کار ته دوام ورکوي.
تر دې مخکې د امريکا مرستيال ولسمشر او په کابل کې د امريکا سفير ويلي وو چې د بلخ لانجه دې په سوله ييزه توګه حل شل شي.
په عين حال کې د سيمه ييزو ارګانونو خپلواکه اداره په بلخ کې د عطانور کار غير قانوني بولي او وايي چې لاسليک يې په دولتي ادارو کې د باور وړ نه دی، خو تېره اوونۍ د بلخ لانجمن والي عطانور د دوو ولسواليو ولسوالان بدل کړل او ګواښ يې وکړ که يې په ادارو کې لاسليک ونه منل شي، دی به د حيرتان بندر له عوايدو دولتي مامورينو ته معاشونه ورکړي.
