(کابل ټکی کام، ۱۳۹۶، سلواغې ۲۶) طالبانو د روسي ښکېلاک د ماتې د ۲۹مې کالیزې په مناسبت په خپره کړې اعلاميه کې افغان ولس ته د دې بریا د مبارکۍ تر څنګ د الله له دربار څخه شهيدانو ته دعا او مهاجرينو، معيوبينو او زورېدلو افغانانو ته يې د ثوابونو غوښتنه کړې.
طالبانو په خپله اعلاميه کې ويلي چې امريکايي اشغالګر دې تېر تاريخ ته نظر وکړي او د خپل کانګريس د غړو هغه ويناوې دې جدي وبولي چې “افغانستان د امپراطوريو هديره بولي” زياتوي په تېر تاریخ کې هيڅ لښکر نه دی توانېدلی چې افغان ملت مات کړي بلکې پر وړاندې يې هر يرغل شکست خوړلی دی.
طالبانو په دغې اعلاميه کې په افغانستان کې د امريکا د زور ستراتيژي پلي کول د بې نتيجې وينې تويونې او جګړې اوږدولو لامل بللې او زياتوي چې “اسلامي امارت په امریکایي حکومت او تصمیم نیوونکو چارواکو غږ کوي چې د زور ستراتيژي پرته له دې چې جګړه اوږده او له دواړو خواوو د اضافه وینو تویېدلو باعث شي بله نتیجه نلري. موږ د جګړې د دوام په ځای غواړو چې اشغال شوی هیواد مو ازاد او د خپل اختیار څښتن شي او ملت مو له خپلو دیني معتقداتو او ملي ارزښتونو سره برابر نظام ولري”.
دغه راز په اعلاميه کې د افغانستان د روانې ستونزې حل په خپله خوښه د امريکايانو او نورو بهرنيو ځواکونو وتل بلل شوي او زياته کړې يې ده که امريکا جګړې ته دوام ورکوي نو پايله به يې يوه ورځ د روسانو په څېر ماتې او دوی به هم “د ذلت او شکست پیټی په شا په تیښته مجبوریږي”.
نن د سلواغې ۲۶ چې د پخواني شوروي اتحاد لښکرې ۲۹ کاله مخکې په همدې ورځ له افغانستان څخه په ماتې منلو سره ووتلې.
