(کابل ټکی کام، ۱۳۹۶، سلواغې ۲۶) د فراه او فارياب ولايتونو امنيتي مسوولين او چارواکي وايي، چې د طالبانو به بریدونو کې لس پوليس وژل شوي دي.
د فراه د ولايتي شورا رييس فريد بختور رسنيو ته ويلي، طالبانو د بالابلوک ولسوالۍ په دارستان سيمه کې پر يوه پوسته بريد کړی، پوسته يې نيولې او د عامه نظم اووه پوليس يې وژلي دي.
په فراه کې يوې امنيتي سرچينې له نوم نه ښودلو په شرط ويلي، چې په دغې بريد کې طالبانو ته هم مرګ ژوبله رسېدلې ده.
طالبانو د بريد مسئوليت په غاړه اخيستی او وياند يې قاري يوسف احمدي ويلي، په بريد کې نهه پوليس وژل شوي چې جسدونه يې د جګړې په ډګر پاتې دي.
نوموړی وايي، د بريد په پایله کې يې پوسته نيولې او د وژل شويو پوليسو ديارلس ميله وسلې او نور پوځي مهمات طالبانو د طالبانو لاسته لوېدلي دي.
دوه ورځې مخکې، د دغې ولايت امنيتي مسئولينو د طالبانو پرضد د عملياتو د پيلولو خبر ورکړی و.
له بله پلوه د فارياب ولايت له قيصار ولسوالۍ څخه د وسله والو بريدونو راپورونه ورکول شوي دي.
د کورنيو چارو وزارت په يوه خبرپاڼه کې ويلي، تېره شپه وسله والو طالبانو د قيصار ولسوالۍ په څو امنيتي پوستو بريدونه وکړل، چې په پايله کې يې درې دولتي عسکر وژل شوي او يو بل ټپي دی.
په خبرپاڼه کې راغلي، چې طالبانو ته هم په دغې بريدونو کې مرګ ژوبله اوښتې ده.
