(کابل ټکی کام، ۱۳۹۶، کب ۳) د غزني چارواکي وايي، د دغې ولايت په ده يک ولسوالۍ کې د طالبانو په بريد کې اته سيمه ييز پوليس (اربکيان) وژل شوي دي.
د غزني د والي وياند محمد عارف نوري رسنيو ته ويلي، تېره شپه طالبانو د يادې ولسوالۍ په رباط سيمه کې د سيمه ييزو پوليسو په پوسته بريد کړی، په ترڅ کې اته تنه وژل شوي او دوه تنه يې د بنديانو په توګه له ځان سره ژوندي وړي دي.
د نوري په وينا، په نښته کې طالبانو ته هم مرګ ژوبله اوښتې خو په اړه يې کره معلومات نه لري.
طالبانو د بريد مسئوليت په غاړه اخيستی او کابل ټکی کام ته يې په رالېږلې خبرپاڼه کې ويلي، په دغې بريد کې د پوستې د قومندان په ګډون نهه اربکيان وژل شوي او يو تن يې دوی ژوندی نيولی دی.
خبرپاڼه کې راغلي، چې طالبانو له دغې پوستې څخه دولس ميله سپکې او درنې وسلې، پوځي توکي او په زياته اندازه مهمات ترلاسه کړي دي.
د ورکړل شويو راپورنو پر اساس، د روان کال له پيل راهيسې تر دې دمه دا پنځم ځل دی چې ياده پوسته د طالبانو له لوري نيول کېږي او اربکيانو ته پکې مرګ ژوبله اوړي.
