د صومالیا په پلازمېنه موګادیشو کې، د جمعې په ورځ، دوو موټر بم بریدونو نږدې ۴۵ کسان وژلي او ۳۶ نور یې ټپیان کړي دي.
د صومالیا پولیسو رسنیو ته ویلي چې لومړۍ چاودنه ولسمشرۍ ماڼۍ ته نږدې رامنځته شوه، بیا وروسته ډزې پیل شوې، لږه شېبه وروسته یوه بله چاودنه له یوه هوټل سره وشوه.
د چارواکو په خبره، له چاودېدونکو توکو بار موټر له امنیتي پوستې د تېرېدو هڅه کوله چې ولسمشرۍ ماڼۍ ته ځان ورسوي، خو امنیتي ځواکونو یې مخه ونیوله. د محمد عبدالحی په نوم یوه امنیتي چارواکي رویټرز اژانس ته ویلي چې په بریدونو کې د وژل شويو کسانو زیاته برخه پوځیان، د ولسمشرۍ ماڼۍ او چارواکو ساتونکي دي.
د القاعده اړوند الشباب جهادي ډلې د یادو موټر بمونه مسؤلیت منلی دی. یادې ډله په یوه اعلامیه کې ویلي چې په بریدونو کې ۳۵ پوځیان او د دوی پنځه بریدکوونکي وژل شوي دي.
د الشباب په نوم جهادي ډله غواړي چې د صومالیا حکومت ته سقوط ورکړي. په ۲۰۱۱ز کال کې، د افریقايي اتحاد ځواکونو الشباب ډله له پلازمېنې وایستله، خو اوس هم د صومالیا پراخې سیمې په کنټرول کې لري او وخت ناوخت پر حکومتي او پوځي هدفونو بریدونه کوي.
