( پنځمه برخه)
کور واله او جماع:
پرمېړه باندې د ښځې څلورم حق کور واله اوجماع کول دي ، ځکه چې الله تعالی په قرآن کريم کې ميړونو ته حکم کړی دی چې: کله د دوی ميرمنې له حيض څخه پاکې شي نو کورواله او جماع دې ورسره وکړي. لکه چې د بقره په سورت کې يې فرمايلي دي: فَإِذَا تَطَهَّرْنَ فَأْتُوهُنَّ مِنْ حَيْثُ أَمَرَكُمُ اللَّهُ ۚ إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ (۲۲۲( نِسَاؤُكُمْ حَرْثٌ لَّكُمْ فَأْتُوا حَرْثَكُمْ أَنَّىٰ شِئْتُمْ ۖ وَقَدِّمُوا لِأَنفُسِكُمْ ۚ وَاتَّقُوا اللَّهَ وَاعْلَمُوا أَنَّكُم مُّلَاقُوهُ ۗ وَبَشِّرِ الْمُؤْمِنِينَ(۲۲۳) (البقره)
ترجمه: نو هرکله چې ښځې پاکې شوې دوی (( له حيض څخه )) نو ورځئ دوی ته ((په جماع کولو سره )) له هغه ځايه چې حکم کړی دی تاسې ته الله تعالی ، بېشکه چې الله خوښوي بيا بيا توبه ايستونکی ((له ګناهونو څخه )) اوخوښوي ځان ساتونکی له ((پليتيو څخه )) ښځې ستاسې ځای د کرلو د((نسل)) ستاسې دی ، نو راځي ځای د کرلو خپلو ته ((چې قبل دی)) په هرډول سره چې خوښه وي ستاسې او په مخ کې ولېږئ تاسې ، د پاره د ځانونو خپلو او وورېږئ له الله څخه او وپوهېږئ چې بېشکه تاسې ملاقات کوونکي ياست له الله سره او زيری ورکړه مومنانوته . امام ابن حزم ويلي دي : په دغه پورتني مبارک ايت سره پرمېړونو باندې فرض دی چې له خپلو مېرمنو سره جماع وکړي، کله چې هغوی له حيض او نفاس څخه پاکې وي او دا پرمېړه نو باندې دښځې شرعي حق دی ، ځکه چې الله تعالی مېړونوته امر پرې کړی دی . او فرمايلي يې دي چې ((فاتوهن)) يعنې دوی ته په پاکۍ کې په جماع کولو سره راتله وکړئ.(تفسيرابن کثير:ج۱ ۳۳۲۲..)
علامه سيد سابق مصري پخپله فتاوی کې ويلي دي : د اسلامي امت جمهورو علماوو هم د وجوب فتوا ورکړې ده .
