(کابل ټکی کام، ۱۳۹۶، کب ۲۱) د ننګرهار ولايت په بټي کوټ ولسوالۍ کې د يوه راکټي بريد په ترڅ کې د يوې کورنې اووه تنه غړي وژل شوي دي.
د ننګرهار د والي وياند عطاءالله خوږياڼی وايي، پېښه تېره شپه په نبي خيلو سيمه کې هغه مهال رامنځته شوې چې د يوې کورنۍ غړي په يوه سراچه موټر کې د فاتحې مراسمو ته پر لاره و.
په وژل شويو کې دوه مېرمنې، درې ماشومان او دوه نارينه شامل دي او دوه تنه نور ټپيان دي.
د خوږياڼي په خبره، په دې کسانو د طالبانو له خوا راکټي بريد شوی او ياده مرګ ژوبله يې اړولې ده.
طالبانو په بريد کې لاس لرل رد کړي او وياند يې ذبيح الله مجاهد رسنيو ته ويلي، (د بټي کوټ ولسوالۍ په راکټي بريد کې د اسلامي امارت مجاهدين هيڅ لاس نه لري).
مجاهد زياته کړې، پيښه په سیمه کې د انسان تښتوونکو د شریر بانډ لخوا تر سره شوې، مجاهدینو د جنایتکارانو په لټه پسې عملیات پيل کړي، یوتن يې وژل شوی دی.
په دې وروستيو کې په ننګرهار کې د حکومت له لوري د سلګونو خلکو د وسله وال کېدو سره د دغې ولايت امنيتي وضعيت خراب شوی چې وخت ناوخت پکې دغه ډول پېښې رامنځته کېږي.
