سرلیکنه
اشرف غني د جمهوري ریاست د انتخاباتو د کمپاین او بیا د حکومت له پیله دا غږ کوي چې په هېواد کې یې کاري لومړیتوب د جګړې پای ته رسول او سوله ده. تېره ورځ یې بیا، په داسې حال کې چې حکومت یې له هرې خوا اختلافاتو شړولی دی، وویل: د ملي وحدت حکومت به په افغانستان کې د سولې، ثبات او هوساینې بنسټ کېږدی.
دا وینا چې اوس اشرف غني وکړه د نورو هېوادونو مشرانو خپلو ولسونو ته په وار وار کړې ده، اشرف غني به ترې اورېدلې وي. خو اشرف غني باید د خپل او نورو هېوادونو ترمنځ توپیر هم وکړي.
په نورو هېوادونو کې سوله، ثبات او هوسا ژوند د سولې پر بنسټ برابرېږي. هغه واکمن چې په خپل هېواد کې یې، پخپل واک د سولې او ثبات بنسټ ایښی وي بیا پرې د هوسا ژوند ماڼۍ هم جوړوي.
اشرف غني ته خو امریکا د بن په غونډه کې د جګړې بنسټ ایښی. کرزي په دوه دورو کې د جګړې پر بنسټ بل د سولې بنسټ کېنښود او نه یې د جګړې پر بنسټ د سولې مانۍ جوړه کړه. اشرف غني به یې پرې په داسې وخت کې څه جوړه کړي چې ۶۰ سلنه خاوره ترې طالبانو نیولې ده؟
طالبان جګړه نه کوي، جګړه پرې تپل شوې ده، اړ دي چې د خپل ولس دفاع وکړي. طالبانو تل د سولې غږ پورته کړی، خو د رښتینې سولې – د هغې سولې چې په افغانستان کې پرې جګړه پاې ته ورسېږي. نه د امریکا سوله، چې نوم د سولې اخلي او د جګړې د دوام لپاره افغانستان ته بیا پوځونه او جنګي الوتکې رالېږي.
طالبان هر وخت سولې ته حاضر دي، خو امریکا نه، چې نوم د سولې او په عمل کې جګړه کوي. اشرف غني دا تبلیغوي چې طالبان ورسره سولې ته نه دی حاضر شوي. دا سوله نه ده. د جنوبي اسیا او افغانستان لپاره د ټرمپ په نوې سټراټیژۍ کې د سولې نوم هم نه شته، ټوله سټراټیژي پر جګړه څرخي. امریکا د بن په غونډه کې په افغانستان کې د جګړې بنسټ ایښی او اشرف غني پرې اوس د سولې ماڼۍ جوړوي..!!
اشرف غني سره له دې چې ځان ته اقتصادپوه هم وايي بیا هم تکراروي چې افغانستان به هیڅ وخت شا ته ونه ګرځي. که د اشرف غني موخه د افغانستان تجزیه یا د تل لپاره د امریکا مستعمره کېدل وي، نو په رښتیا تراوسه لا افغان مجاهد ولس له قربانیو او د بهرنیانو په مقابل کې له مقاومته شا ته نه دی ګرځېدلی، یانې له منځه نه دی تللی.
افغان ولس په خپل هېواد کې د سولې او ثبات لپاره قرباني ورکوي، هوسا ژوند غواړي؛ خو د جګړې پر بنسټ هیڅ وخت د سولې ماڼۍ نه جوړېږي. افغان ولس هغه وخت د هوسا ژوند خاوند کېږي چې په هیواد کې د امریکا لخوا د جګړې د دوام عوامل له منځه یووړل شي.
افغان ولس به هغه وخت له کورونو د جنازو د وتلو، ویر او ساندو پر ځای له هوسا ژونده برخمن شي چې امریکا پر افغان ولس له تپل شوې جګړې لاس واخلي او افغانان په خپلو کې یوې بین الافغاني غونډې او مذاکراتو ته پرېږدي.
اشرف غني باید په دې ښه ځان پوه کړي چې په افغانستان کې د امریکا لخوا د جګړې پر ایښودل شوي بنسټ، نه د سولې بل بنسټ او نه د سولې ماڼۍ جوړېږي.
