تخار: د خواجه غار په مربوطاتو کې یوشمیر پوستې د طالبانو لاس ته لويدلې
(کابل ټکی کام ۱۳۹۶ کب ۲۶ فرید افغان)
له تخار ولایت څخه خبرونه وایي؛ چې طالبانو د خواجه غار ولسوالۍ اړوند دپول پول مؤمن او ګورتپه سیمو کې د ملي اردو او سيميزو پولیسو له ځواکونو څخه یو شمیر پوستې نیولې.
سيميزې سرچینې وایي؛ طالبانو د تیرې شپې له ۱۲ بجو د سهار تر ۴ بجو پورې پر یادو پوستو تعرضي بریدونه وکړل چې په پوستو کې میشت ځواکونه یې د پوستو پريښودلو ته اړ کړل.
طالب ویاند ذبيح الله مجاهد خبر ورکړی؛ چې په سیمه کې یې څو پوستې نیولې او ۵ تنه ملي اردو او اربکیان یې وژلي او د یو قوماندان په ګډون ۴ تنه یې ټپیان کړي.
طالبانو د ګڼو مهماتو د نیولو خبر هم ورکړی.
ځایي چارواکو او د دفاع وزارت په دې تړاو کوم سپيناوي نه دی کړی.
د یادونې وړ ده چې طالبانو په وروستیو څو ورځو کې په تخار، بادغیس، غور او فاریاب کې ګڼ پرمختګونه کړي او زیاتې سیمې یې تر خپل واک لاندې راوستلې دي.
