د شفافیت نړیواله اداره : په حکومت کې شته اداري فساد ولسونه د طالبانو پلویان کړي
(کابل ټکی کام ۱۳۹۶ کب ۲۸ فرید افغان)
د ملګرو ملتونو د شفافیت نړیوال سازمان ویلي چې په دولتي ادارو کې پراخ اداري فساد افغان ولسونه هڅولي ترڅو خپل اعتماد پر طالبانو زیات کړي.
د دې سازمان یوه غړي «فرانک واګل» ویلي؛ د افغان دولت په قضایي ارګانونو، امنیتي اداراتو او ګڼو نورو برخو کې په پراخه کچه فساد روان دی ،چې په وینا یې د روان بحران لوی لامل ده.
واګل ویلي ډیری فساد او مافیا د مخدره توکو په قاچاق کې ده چې د نړیوالو په ګډون ګڼې امنیتي ادارې هم پکې ښکیلې دي.
نوموړي ویلي؛ امریکایان د ترخو حقایقو څخه ډډه کوي ځکه چې په خبره یې، هغوی پوهیږي دا به د دوی پر وړاندې د ولسونو نوره کرکه هم را وپاروي.
باید وویل شي چې افغانستان د نړۍ په کچه څلورم فاسد هیواد ده چې په ټولو دولتي اداراتو کې یې په یو نه، یو ډول فساد روان ده.
