اروزګان : د ملي اردو ۱۵ سرتیري طالبانو ته ورغلي
(کابل ټکی کام ۱۳۹۷ وری ۷ فرید افغان)
د اروزګان ځایي چارواکي وایي چې د دې ولایت د خاص اروزګان په ولسوالۍ کې تر سختو جګړو وروسته د ملي اردو ۱۵ عسکر طالبانو ته تسلیم شوي.
د ګېزاب ولسوالۍ امنیه قوماندان لالي پژواک خبري اژانس ته ویلي چې د یادو ځواکونو له ډلې یې یو تن چې د ګیزاب اوسیدونکی و، بیرته له طالبانو تښتیدلی او نور لا هم له طالبانو سره دي.
خو د دې ولایت د والي ویاند بیا د سرتیرو تسلیمیدل نه مني او تائیدوي چې د خاص اروزګان ولسوالۍ تر سختو بریدونو لاندې ده او ښایي سقوط وکړي.
طالبانو تر اوسه په دې تړاو کوم سپیناوی نه دی کړی.
باید وویل شي چې نن هم د دې ولسوالۍ دوه پوستې طالبانو نیولې او تر ۲۰ ډیرو امنیتي ځواکونو ته یې مرګ ژوبله اړولې وه.
