افغانستان ته زر نور امريکايي پوځيان راورسېدل
(کابل ټکی کام، ۱۳۹۷، وری ۱۱) د امريکا د دفاع وزارت يا پنټاګان وايي، چې زر نور تازه دمي امريکايي پوځيان افغانستان ته رسېدلي ترڅو د افغان ځواکونو سره په جګړو، مشورو او د هغوی پوځي کچې په لوړولو کې مرسته وکړي.
پنټاګان ويلي، د دغې ليوا ډیری سرتيري په افغانستان او عراق کې پوځي تجربه لري او اوس مهال په رضاکارانه ډول افغانستان ته لېږل شوي دي.
په افغانستان کې د امريکايي ځواکونو قومندان ډګروال سکاټ جاکسن وايي، نوي امریکايي ځواکونه به د افغان ځواکونو د کنډک او لیوا په کچه روزنه ورکوي، هغوی ته سلامشورې او په جګړييزو برخو کې به يې مرستې کوي.
د هغه په خبره، دوی به د ځان خونديتوب ته هم پاملرنه کوي ترڅو د افغان ځواکونو له خوا پرې بريد ترسره نه شي.
د افغانستان او سيمې ستراتيژۍ د اعلان پر مهال امريکايي چارواکو ويلي و چې د افغان جګړې ماموريت لپاره به نور امریکايي او ناټو ځواکونه هم افغانستان ته واستوي.
د راپورونو له مخې، د نويو امریکايي عسکرو په راتګ سره افغانستان کې د امريکايي ځواکونو شمېر څوارلس نيم زره تنو ته ورسېد، چې ډيری يې په هوايي بريدونو، شپنيو چاپو او په مخامخ جګړو کې له افغان ځواکونو سره ګډه همکاري کوي.
