هند افغانستان ته د څلورو پوځي الوتکو سپارل ځنډولي دي
(کابل ټکی کام، ۱۳۹۷، وری ۱۸) هندي پوځي چارواکو د دغې هېواد رسنيو ته ويلي، چې د ځينو ستونزو له کبله يې افغانستان ته د ژمنه شويو څلورو جنګي الوتکو ورکول ځنډولي دي.
د چارواکو په وينا، افغانستان کې ځينې ستونزې او په بېلاروس کې د الوتکو د کار نه بشپړتيا د دې لامل شوی چې افغانستان ته د الوتکو د ورکړې بهیر څو مياشتې وځنډوي.
شاوخوا لس ورځې مخکې په نوي ډهلي کې د افغانستان سفير شيدا محمد ابدالي ويلي و، چې د هند افغانستان او بیلاروس تر منځ يو تړون لاسليک شوی، چې له مخې يې بيلاروس افغانستان ته څلور ام ۲۴- زړې جنګي الوتکې ورکوي چې شاوخوا شل ميلونه ډالره لګښت پرې راځي او ټول لګښت به يې هند پرې کوي.
نوموړي ويلي و، د هند او بیلاروس له لوري افغانستان سره د نوو نه بلکې د زړو الوتکو مرسته کېږي خو په خبره يې چې د الوتکو پرزې او وسايل به يې نوي کېږي.
شيدا محمد ابدالي تاييدوي، چې د هند له لوري افغان حکومت ته د الوتکو د سپارلو ورکړه ځنډېدلې ده خو په دې اړه يې نور جزيات نه دي ورکړي.
د يادونې ده، چې هند له دې مخکې هم د افغانستان هوايي ځواک سره د څلورو جنګي الوتکو مرسته کړې وه چې افغان حکومت يې د طالبانو پرضد په جګړو او هوايي بريدونو کې کاروي.
څو مياشتې مخکې، د هند مرسته شويو الوتکو چې افغان پوځ ته يې سپارلي د غزني ولايت په ګيرو ولسوالۍ کې پر يوه لوبغالي او يوه کور هوايي برید وکړ په ترڅ کې يې څلور ماشومان ووژل شول او دوه تنه نور ټپيان شول.
