جرمني: لارۍ بريد کې څلور تنه وژل شوي ۳۰ ټپيان دي
(کابل ټکی کام، ۱۳۹۷، وری ۱۸) د غربي رسنيو د راپورونو له مخې، جرمني کې د خلکو پر ګڼې ګوڼې يوه مارکيټ لارۍ ورغلې چې له کبله يې لسګونو کسانو ته مرګ ژوبله اړولې ده.
د جرمني پوليسو د فرانسې خبري اژانس ته په لومړنيو معلوماتو کې د دېرش کسانو د ټپي کېدو او يو شمېر نورو د وژل کېدو خبر ورکړی دی.
ځايي رسنۍ وايي، پېښه مونسټر ښار کې رامنځته شوې څلور تنه وژل شوي خو د امنيتي مسئولينو په وينا ښايي د مرګ ژوبلې شمېره تغير وکړي.
د جرمني پوليس وايي، برید کوونکي له بريد وروسته ځان هم ويشتلی زياتوي چې امکان لري دا يوه ترهګريزه حمله وي.
سيمې ته پوليس او د استخباراتي ادارو کارمندان او چورلکې رسېدلي او خلکو ته يې ويلي چې د پېښې ځای ته دې نږدې نه ورځي.
دا په جرمني کې د لارې دوهم ستر بريد دی چې لسګونه خلک پکې ژوند له لاسه ورکوي.
په کال ۲۰۱۶ کې هم د جرمني په برلين کې په خلکو يوه لارۍ ورختلې وه چې په ترڅ کې يې دولس تنه وژل شوي و.
