پر سوریې د امریکا په برید کې اوښتي زیانونه او ادعاوې
(کابل ټکی کام ۱۳۹۷ وری ۲۵)
که څه هم د امریکا د بهرنیو چارو وزارت ادعا کړې چې خپلو هدفمندو بریدونو کې یې د سوریې د کیمیاوي وسلو مرکزونه په نښه کړي خو روسیې او سوریې دواړو دا ادعاوې رد کړې.
نن سهار وختي د سوریې ۸ نظامي اهداف د امریکا، فرانسې او بریتانیې له خوا په نښه شول .
رویټرز د سوریې د یو چارواکي له قوله خبر ورکړی چې روسانو مخکې تر دې چې حمله وشي دوی ته د مراکزو د تخلیې امر کړی و او په خبره یې چې مرکز لګیدلي خو نور زیان نه لري.
د سوریې خبري اژانس سانا ویلي چې د امریکا دسلو توغندویزو بریدونو له ډلې یې ګڼ شمی توغندي په هوا کې له منځه وړي.
د سوریې پوځ وایي؛ دوی د اس ۱۲۵ اس ۲۰۰ او سام ۶ څخه په استفادې دا توغندي یا له منځه وړي یا یې له هدف څخه ګرځولي.
سانا ویلي د امریکا په حمله کې یواځې ۳ تنه ټپیان شوي او نور هیڅ ځاني مرګ ژوبله نه لري.
تر بریدونو وروسته د بشارالاسد د حکومت پلوي خلک لارو کوڅو ته راوتلي او د امریکا د ناکام برید له امله یې د خوښۍ جشن جوړ کړی.
د امریکا د دفاع وزیر جیمز مټیس وایي؛ پر سوریه نور برید نه کوي او دا یې لومړی او وروستی برید و.
فرانسې هم ویلي چې د سوریې د حکومت نسکورول یې هدف نه و ،یواځې یې د کیمیاوي وسلو زیرمې له منځه وړلې.
روسیې ویلي چې توغندویز بریدونه د دوی دوو لویو پوځي اډو ته نه دي رسیدلي.
ایران دا بریدونه غندلي خو ترکیې یې هرکلی کړی
