امریکا: په تیره یوه میاشت کې مو د افغانستان په مختلفو سیمو۳۵۰ هوایي او توغنديز بریدونه کړي

(کابل ټکی کام ۱۳۹۷ وری ۳۰)

د امریکا د مرکزي قوماندې دفتر وایي؛ چې په تیره یوه میاشت کې یې د افغانستان په مختلفو سیمو سلګونه هوایي او توغندویز بریدونه کړي.
د فاکس نیوز د خبر تر مخه؛ د امریکا مرکزي قوماندانۍ ویلي؛ دیوې میاشتې په بهیر کې د افغانستان په بیلابیلو نقاطو کې ۳۵۰ هوایي بریدونه شوي چې دا دعراق دجګړې په نسبت څو چنده زیات بریدونه دي.

امریکا داسې مهال د دې بریدونو له زیاتوالي خبر ورکوي چې په ځلونو د هیواد د ولسي جرګې او نورو چارواکو ویلي چې دا ځواکونه په لوی لاس ولسي خلک په نښه کوي.

د امریکایي ولسمشر د نوې ستراتیژي تر اعلان وروسته په افغانستان کې د هوایي بریدونو د تیرو کلونو په نسبت شمیر څلور چنده زیات شوی.

سیاسي کارپوهان وایي چې د امریکا جګړیزه ستراتیژي نه شي کولی طالبان کمزوري کړي او که وضعیت دا ډول دوام وکړ ښایي ډیری ولسونه یې پرضد پاڅون ته اړ شي.