(کابل ټکی کام ۱۳۹۷ غویی ۳)
د کندوز ولایت ځایي چارواکي وایي چې په دې ولایت کې سلګونه ښوونځي چې د مختلفو لاملونو له کبله د طالبانو له خوا په موقت ډول تړل شوي و، بیرته پرانیستل شول.
د کندوز د پوهنې سرپرست رئیس رستم احمدي رسنیو ته ویلي؛ د ښوونځيو د بېرته خلاصېدو په اړه د قومي مشرانو او طالبانو تر منځ شفاهي پرېکړه شوې او نن د دې ولایت په ټولو نقاطو کې بیرته یاد ښوونځي پرانستل شوي دي.
طالبانو هم د دې چارې پخلی کړی او ویلي یې دي چې دوی د ښوونځیو سره هیڅ کوم مخالفت نه لري خو د دوی په وینا چې د کندوز ولایت په مرکز او خواو شا ولسوالیو کې له تیرو څو میاشتو راهیسې د ښوونځیو او لیسو مدیرانو، ښوونکو او کارکوونکو ته د معاشونو د نه ورکولو په شمول ګڼې ستونزې وې چې د ښوونځیو درسي بهیر یې له ګواښ سره مخ کړی و ، چې بالاخره نن یادو ستونزو ته د پای ټکی کیښودل شو او د کندوز ولایت تول تړل شوي ښوونځي له سره پرانیستل شول.
طالبانو ویلي
“د کندوز په شمول په ټول هیواد کې د اسلامي امارت تر واک لاندې ساحه کې چاته د دې اجازه نه ورکول کیږي چې د هیواد والو د تعلیمي بهیر لپاره په مزاحمت ایجاد ولو سره د هغه ممانعت وکړي“
باید وویل شي چې د هیواد په ټولو هغوسیمو کې چې د طالبانو تر کنترول لاندې دي، پرښوونځیو او د هغوی د درس او تدریس پر څرنګوالي طالبان څارنه کوي.
او د ښوونکو او زدکړیالانو حاضري هم ارزیابي کوي، چې په دې کار سره د اړوندو سیمو ولسونه هم خوښ دي او په تعلیمي برخه کې یې هڅې ستایی.
