(کابل ټکی کام ۱۳۹۷ غویی ۴)
له یمن څخه راپورونه وایي چې دتیرې ورځې په تعقیب یو ځل بیا د دې هیواد په حجه ښارګوټي کې هوایي بریدونه شوي.
د فارس خبري شبکې د راپور تر مخه،د حجه ښارګوټي اړوند دعبس په ښار کې د تیلو پر یوه پمپ چې ګڼ خلک ورباندې راټول و، د سعودي په مشرۍ د عرب ایتلاف الوتکو هوایي برید کړی چې لسګونو کسانو ته یې مرګ ژوبله اړولې لومړني معلومات ښيي چې په دې برید کې ۱۸ تنه وژل شوي او ۱۳ نور ټپیان دي.
دا په داسې حال کې ده چې تیره ورځ هم پردې ښارګوټي د عرب ایتلاف الوتکو د واده پر مراسمو هوایي برید کړی و، چې په کې ۳۳ تنه وژل شوي و او لسګونه نور ټپیان و.
بل پلو حوثي یاغیانو د سعودي پر ځینو سیمو یوځل بیا توغندوییز بریدونه کړي خو معلومه نه ده چې توغندي پر هدف لګیدلي که خنثا شوي دي.
