(کابل ټکی کام، ۱۳۹۷، غویی ۶) په بادغيس ولايت کې طالبانو سر د لسګونو پوليسو له يوځای کېدو وروسته د دغې ولايت امنيتي مسئولينو نږدې شل پوليس بې وسلې کړي دي.
دوه ورځې مخکې د ياد ولايت په قادس ولسوالۍ کې د حاجي غني په نوم يو قومندان له خپلو ۲۹ پوليسو سره طالبانو ته تسليم شو.
خو تازه د بادغيس امنيه قومندان عبدالرؤف تاج وايي، طالبانو ته د لسګونو پوليسو له تسليمېدو وروسته يې پريکړه وکړه چې د يادې سيمې اتلس تنه پوليس بې وسلې کړي، ځکه چې په وينا يې يوځل بيا داسې څه پېښ نه شي چې دولتي وسلې د طالبانو لاسته ورشي.
نوموړي په قادس ولسوالۍ کې د نويو عملياتو د پېلېدو خبر ورکړ او خبرداری يې ورکړ چې تسليم شوي پوليس به د خپل عمل نتيجه وګوري.
د تاج په خبره، دا يواځې بادغيس نه دی چې سيمه ييز پوليس له طالبانو سره يوځای کېږي بلکې دغه ستونزه د هېواد په نورو برخو کې هم شتون لري چې وخت ناوخت ځينې پوليس د طالبانو ليکو ته ورځي.
د يادونې ده، چې د غویی په څلورمه نېټه د طالبانو وياند قاري يوسف احمدي ادعا کړې وه چې په قادس ولسوالۍ کې يې د ګلچين مهمه سيمه، شپږ پوستې او يوه لويه قرارګاه له دولتي ځواکونو ونيولې.
د هغه په وينا، په دې نښتو کې ورته د یو قومندان په ګډون ۲۹ پوليس تسليم شوي او په پايله کې “۲۷ میله کلاشینکوف، ۲ پيکاوې، ۴ عراده رینجر موټر، ۸ عرادې موټر سایکل او خورا ډیر مهمات د مجاهدینو لاسته ورغلي دي”.
