(کابل ټکی کام ۱۳۹۷ غویی۷)

د فاریاب ولایتي شورا او یو شمیر چارواکي خبر ورکوي چې د فاریاب ولایت د المار ولسوالۍ چې د جمعیت ګوند له قوي نفوذ څخه برخمنه ولسوالۍ ده، اوس د سقوط پر ګړنګ ولاړه ده.
دوی وایي؛ د المار سقوط ښایي د فاریاب د ولایت د سقوط پیلامه شي ځکه طالبانو په دې ولسوالۍ کې ګڼ مهمات نیولي او د مخالف لوري تکړه قوماندانان یې په نښه کړي.
د فاریاب ولایت چارواکي مني چې طالبانو تیره ورځ د المار ولسوالۍ د چغاتک سیمه نیولې او هلته د میشتو ځواکونو پوځي مراکز یې هم تر خپل کنترول لاندې راوستلي.
په یاده ولسوالۍ کې څو ورځې وړاندې دجمعیت ګوند لوړپوړی قوماندان جنرال فاروق قاطع او د هغه ورور عبدالقادر وژل شوي و.

طالبانو د المار ولسوالۍ اړوند د چغاتک د سیمې چې ۳۵۰۰کورونه په کې میشت دي د نیولو پخلی کړی او زیاته کړې یې ده چې په دې سیمه کې یې ۲قرارګاوې او۹پوستې نیولې دي.
طالب ویاند همداراز د ۶ موټره مهماتو د نیولو خبر هم ورکړی دی.

په همدې حال کې د کمانډو ځواکونو ویاند احمدجاوید سلیم ویلي چې د المار د سقوط د مخنیوي په موخه دې ولسوالۍ ته د جنبش ګوند د قوماندان جنرال نظام الدین قیصاري په مشرۍ تازه دمي ځواکونه رسیدلي.

یو شمیر ځایي سرچینو بیا خبر ورکړی چې طالبانو تر چغاتک وروسته د خواجه سبز پوش پراخه سیمه هم نیولې.
خو طالبانو تر اوسه په دې تړاو تر اوسه کوم سپیناوی نه دی کړی