(کابل ټکی کام ۱۳۹۷ غویی ۷)
نن د ثور (غویي) اوومه نیټه ده، څلور لسیزې وړاندې پر همدې ورځ د پخواني شوروي اتحاد له ملاتړ برخمنو کمونستانو د داودخان پر رژیم کودتا وکړه او را ویې پرزاوو، چې دا نیټه د هیواد په تاریخ کې تر ټولو بدمرغه ورځ ځکه پیژندل کیږي چې په هیواد کې د دربدریو خونړیو پیښو ټولوژنو او د میلونونو افغانانو کډوالۍ ته په کې لار هواره شوه.
طالبانو د ثور د اوومې او اتمې په مناسبت یوه اعلامیه خپره کړې او ویلي یې دي چې “ دثور اوومه او اتمه موږ ته راښيي چې په دې هیواد کې پردۍ ایډیالوژۍ که څه هم ډیر جالب شعارونه ولري او کلونه کلونه ورته تبلیغ شوی وي، بیا هم چلښت نلري“
طالبانو د ۱۳۷۱ هـ ش کال د ثور د اتمې نیټې بریا د افغان اولس ویاړمنه جهادي لاسته راوړنه بللې او ټول افغان مجاهد اولس ته یې مبارکي ویلې.
طالبان وایي چې د کمونیزم ماتې د کوم تنظیم یا ډلې کارنامه او بریا نه ده “بلکې د یاد جهاد بریا د ټول افغان ملت مشترک ویاړ دی“
اعلامیه زیاتوي؛ د ثور د اتمې له بریا وروسته یو شمیر جهادي مشران له خپل اسلامي مسیر څخه منحرف شول، فساد او د هیواد لوټ تالان ته یې مخه کړه او د مقدس جهاد ارمانونه یې له خطر سره مخامخ کړل “ نو اسلامي امارت د جهاد د اهدافو او یونیم میلیون شهیدانو د ارمانونو د تحفظ لپاره اقدام وکړ او لا هم پر هماغه موقف ټینګار لري .“
طالبانو ویلي “د افغانستان اسلامي امارت اصلا د کمونیزم ضد جهاد د ارمانونو وارث دی“
دې ډلې یوځل بیا ټینګار کړی چې پر خپل سپیڅلي مسیر باور لري چې یو ورځ به د امریکا په مشرۍ نړیوال قوتونه هم په ګونډو کیږي.
