سیګار: د افغان ځواکونو شمېر کابو ۱۱ سلنه راټیټ شوی دی
د افغانستان لپاره د امریکا د متحده ایالاتو څارونکې ادارې په خپل یوه تازه راپور کې ویلي چې د افغان امنیتي ځواکونو شمېر نږدې ۱۱ سلنه راټيټ شوی دی.
په رپورټ کې، چې پرون دوشنبه (۳۰ اپرېل) خپور شوی، د افغانستان د بیارغونې لپاره د امریکا د ځانګړي سرمفتش ادارې (سیګار) ویلي، د روان ۲۰۱۸ز کال د جنورې میاشتې تر پایه د افغان امیتي او دفاعي ځواکونو، چې له اردو، هوايي ځواک او پولیسو عبارت دي، ټول شمېر کابو ۲۹۶۴۰۰ پرسونل وو. په دې سره د تېر کال د همدې میاشتې په پرتله د ځواکونو په شمېر کې ۱۰،۶ سلنه ټیټوالی راغلی دی.
د سیګار مشر جان سوپکو ویلي، ”د افغان امنیتي ځواکونو په پښو درول او جوړول د د امریکا او زموږ د نړیوالو متحدینو ستر لومړیتوب دی. خو د افغان ځواکونو د ځواک او شمېر کمېدل د اندېښنې وړ خبره ده.“
سیګار ویلي چې دا معلومات له تېرو ۶ میاشتو راهیسې پټ ساتل شوي وو.
د سیګار په خبره، د امریکا پوځ اوس هم هغه مهم معلومات د عامو خلکو له سترګو پټ ساتي او د خپرېدو اجازه یې نه ورکوي چې په ۱۷ کلنه اوږده جګړه کې د امریکا پرمختګ ترې معلومېدای شي.
یادې څارونکې ډلې ویلي چې د افغان ځواکونو تلفات، د هغوی د کړنو او عملیاتو ارزونې او د اردو او پولیسو د تجهیزاتو د چمتووالي رپورټونه هغه څه دي چې تراوسه هم پټ ساتل کېږي.
په افغانستان کې مېشتو امریکايي ځواکونو سیګار ته ویلي چې زیاتره معلومات د افغان حکومت په خوښه له عامو خلکو پټ ساتل شوي دي.
د سیګار راپور داسې مهال خپرېږي چې په دې وروستیو میاشتو کې د افغانستان امنیتي وضعیت په چټکۍ د خرابوالي په لور روان دی.
امریکا له ۲۰۰۱ز کال راهیسې هڅه کوي چې افغان ځواکونه له طالبانو د خاورې د دفاع او ساتنې جوګه کړي، او همدې موخې ته یې د رسېدلو لپاره د افغان ځواکونو پر تجهیز او روزنه نږدې ۷۶ میلیارده ډالر لګولي دي.
د تېر ۲۰۱۷ زېږدیز کال په اګست میاشت کې د نوې سټراټیژۍ تر اعلان وروسته، امریکا څو زره نور امریکايي عسکر د افغان ځوکونو د روزنې، سلا او مرستې لپاره افغانستان ته رالېږلي دي.
خو د امریکايي استخباراتو یوه چارواکي د نوم نه ښودلو په شرط رویټرز خبري اژانس ته ویلي چې د امریکا له پراخو لګښتونو، روزنې او مرستې سره سره، د افغان ځواکونو لوی اکثریت له طالبانو سره پخپله جګړه نه شي کولای او د سیمو په بېرته نیولو کې پاتې راغلي دي.
د سیګار ادارې په ګډون ګڼو پوځي کارپوهانو په وار وار ویلي چې امریکا په تېرو ۱۷ کلونو کې، له میلیاردونو ډالره لګښت کولو سره سره، د یو داسې افغان پوځ په جوړولو نه ده توانېدلې چې له بهرنیانو او هوايي مرستې پرته پخپله جګړه پر مخ بوځي.
