(کابل ټکی کام ۱۳۹۷ غویی ۱۵)
د غزني ولایت څخه ځایي خبري سرچینې وایی چې تیره شپه دولتي ځواکونو د دې ولایت د اندړو ولسوالۍ اړوند د شلګر په سیمه کې د ولسي خلکو پر کورونو د ثقیله وسلو ډزې کړې چې ګڼو ملکیانو ته یې مرګ ژوبله اړولې.
سرچینې وایي، دولتي ځواکونو د سلطان باغ او بدوانو په سیمه کې د خلکو پر میشت ځایونو د هوان او توپچي بریدونه کړي چې له امله یې ۲ ښځې ۴ ماشومان وژل شوي او ۵ تنه نور ماشومان ټپیان شوي دي.
طالبانو یاده پیښه بشرضده جنایت بللی او غندلی یې دی.
خو د دفاع وزارت بیا ټول تلف شوي کسان وسلوال طالبان بللي او دا شمیره یې څو چنده زیاته بللې .
د دفاع وزارت ویاند محمد رادمنش ویلي؛“ د اندړو ولسوالۍ په مختلفو کلیو کې ۳۶ تنه ترهګر وژل شوي، ۲۱ تنه ټپیان، د دښمن ۷ موټر سایکل، وسلې او مهمات له منځه وړل شوي دي“
هغه ادعا چې د سیمې خلک او وسلوال طالبان یې ردوي او یواځې پروپاګند یې بولي.
