(کابل ټکی کام ۱۳۹۷ غویی ۱۶)
طالبانو د خوست په ننۍ پیښه کې خپل لاس لرل رد کړي او هغه یې د دښمنو کړیو کار بللی.
طالبانو ویلي “ د خوست ولایت د یعقوبیو اډې په مسجد کې چاودنه کول د اسلامي امارت د مجاهدینو پورې اړه نلري“
طالب ویاند ذبیح الله مجاهد په یوه وضاحت کې ویلي “ دا کوم بدنامونکی عمل دی چې ممکن د دښمنو کړیو لخوا مجاهدینو ته د بدنامۍ د ور اړولو په منظور ترسره شوی وي“
نن ماسپښین شاوخوا ۲:۲۰ بجې د خوست د یعقوبیو اډې جومات کې چې د نوم لیکنې مرکز هم په کې فعال و، چاودنه وشوه چې تر ۳۰ ډیرو کسانو ته یې مرګ ژوبله واړوله.
په ټولنیزو رسنیو کې دا پیښه په لویه کچه غندل شوې او دا کړنه یې د افغان ضده کړیو کار بللی.
فعالانو پر حکومت او ټاکنیزو کمیسیونونو غږ کړی چې که د ولسونو امنیت ته ژمن وي، سملاسي باید د نوم لیکنې ټول مراکز له ښوونیزو ادارو او جوماتونو څخه ور ټول او په خوندي دولتي اداراتو کې ورته ځای ورکړي.
دا په داسې حال کې ده چې دوه اونۍ وړاندې داعش ډلې په کابل کې د نوم لیکنې پر یو مرکز برید کړی و چې لسګونو تنو ته یې مرګ ژوبله اړولې وه.
