(کابل ټکی کام، ۱۳۹۷، غویی ۲۲) د زابل ولايت سيمه ييزې سرچينې وايي، چې له تېرې شپې راهیسې په ارغنداب ولسوالۍ کې د طالبانو او دولتي ځواکونو تر منځ درنه جګړه روانه ده چې دواړو خواوو ته يې مرګ ژوبله اړولې ده.
د زابل ولايت امنيتي سرچينې وايي، طالبانو تېره په يوه وخت په ارغنداب او دايچوپان ولسواليو بريدونه کړي چې لسګونه عسکرو ته يې مرګ ژوبله اړولې ده.
ځايي سرچينې وايي، په ارغنداب کې د طالبانو د بريدونو په ترڅ کې له دېرشو زيات عسکر وژل شوي او اوس هم په ياده ولسوالۍ جګړه روانه ده.
سيمه ييز خبریال صديق الله افغان په خپله فسبوک پاڼه ليکلي، تېره شپه د شملزو ولسوالۍ امنيه قومندان بادام ګل د زابل له امنيه قوماندان جنرال ميرویس نورزي سره د دايچوپان ولسوالۍ د سقوط د مخنيوي لپاره هغې ولسوالۍ ته تللی و.
نوموړی وايي، په نښته کې د شملزو امنيه قومندان بادام ګل او يو شمير عسکر هم وژل شوي دي.
تر اوسه دولتي چارواکو په دې اړه څه نه دي ويلي، خو طالبان په ارغنداب ولسوالۍ بريدونه تاييدوي او کابل ټکی کام ته يې په رالېږلې خبرپاڼې کې ويلي، چې تر دې مهاله يې درې پوستې “د شاولي زړه پوسته، د شنو ټاټو پوسته، د سه کچيچي پوسته” نيولي او اتلس عسکر وژل شوي ګڼ شمير نور ټپيان دي.
خبرپاڼه کې راغلي، په نښتو کې دوه طالبان وژل شوي او لا هم جګړه روانه ده زياتوي چې د جګړې په ترڅ کې طالبانو په زياته اندازه وسلې هم ترلاسه کړي دي.
