افغانستان او پاکستان د ترانزیټي ستونزو د حل تړون لاسلیک کړ
(کابل ټکی کام، ۱۳۹۷، غویی ۲۲) د افغانستان د سوداګرۍ او صنايعو خونې چارواکي وايي، له پاکستان سره د سوداګرۍ او ترانزيتي ستونزو د هوارۍ په موخه يوه هوکړه لاسليک شوې چې له مخې به يې د دواړو هېوادونو د سوداګرو ستونزې تر يوې اندازې هوارې شي.
د سوداګرۍ او صنايعو وزارت وياند مسافر قوقندي وايي، په اسلام اباد کې د دواړو لوريو تر منځ هوکړه شوې چې د افغانستان په تازه ميوو او سبزيو ګمرکي تعرفې کمې او سوداګرو ته به اجازه ورکړل شي چې د افغانستان مالوچ دغې هېواد ته صادر کړي.
د قوقندي په خبره، د اسلام اباد په ناسته کې د دواړو هېوادونو تر منځ د ترانزيت د ستونزو د هواري په اړه خبرې وشوې، د اقتصادي راکړې ورکړې د پراختيا او د سوداګرو د ستونزو د له منځه وړلو په اړه موافقه وکړه.
پاکستان د افغان میوو او سبزيو تر ټولو لوی مارکېټ ګڼل کېږي، خو په وروستيو کې د دواړو هېوادونو تر منځ د سياسي تاوتريخوالي په رامنځته کېدو د افغان سوداګرو د تازه ميوو او سبزيو په صادراتو کې یو لړ ستونزې پيدا شوې چې د سوداګرو په وينا پاکستانی لوری ورڅخه د صادراتو د کره والي سندونه غواړي او ګمرکي تعرفې يې لوړې کړي دي.
بل خوا د سوداګرۍ خونې مرستيال خانجان الکوزی تاييدوي چې د پاکستان سره د لوړې ګمرکې تعرفې ستونزه او د سبزيو د کره والي د سندونو غوښتنې ستونزې حل شوي دي.
د سوداګرۍ خونې د معلوماتو له مخې، تر دې مخکې د پاکستان له لوري د افغان سوداګرو پر صادراتي توکو څلوېښت سلنه ګمرکي تعرفه وه چې اوس دغه پنځلس سلنې ته راټيټه شوې ده.
