په بغلان کې سيلابونو ځاني او مالي زيانونه اړولي
(کابل ټکی کام، ۱۳۹۷، غویی ۲۲) د بغلان ولايت د طبيعي پېښو پر وړاندې د مبارزې اداره وايي، په ياد ولايت کې د وروستيو ورښتونو له کبله سيلابونه راوتلي چې خلکو ته يې مالي او ځاني زيانونه اړولي دي.
د يادې ادارې رئيس نصير احمد کهزاد وايي، د بغلان په بيلابيلو سيمو کې د سيلابونو د راوتلو له امله دوه تنه وژل شوي، دوه تنه نور ټپيان دي او دوه تنه لادرکه شوي دي.
د کهزاد په وينا، سيلابونه د خلکو په ميشت ځايونو ورغلي چې پر مهال يې سل کورونه ويجاړ شوي دي.
د يادونې ده، چې نن د تخار مرکز په تالقانو کې د يوه تندر د لوېدو پېښه کې درې ماشومان وژل شوي و او تېره ورځ په ننګرهار کې د سختو بارانونو او تندر لوېدو له کبله شپږو تنو ته مرګ ژوبله اوښتې وه.
هر کال په افغانستان کې د سختو واورو، ورښتونو او سيلابونو له کبله خلکو ته د سر او مال درانده زيانونه اوړي خو د طبيعي پېښو د مبارزې چارواکي وايي چې د حکومت له لوري ورته لازم وسايل نه دي برابر ترڅو په طبيعي پېښو کې زيانمن شويو خلکو ته پر وخت رسيدګي وکړای شي.
