(کابل ټکی کام، ۱۳۹۷، غویی ۲۳) د پکتيا او لوګر په لويه لاره د يوې ترافيکي پېښې له کبله څوارلس کسانو ته مرګ ژوبله اوښتې ده.
د پکتيا د امنيې قومندانۍ مسئولين وايي، پېښه پرون ماذيګر ناوخته د لوګر- ګردیز پر لويه لاره د مرسيډيز او کرولا موټر د ټکر له امله رامنځته شوې ده.
د مسئولینو په وينا، په پېښه درې کسانو ژوند له لاسه ورکړی او يوولس تنه نور ټپيان دي.
دغه راز د امنيې قومندانۍ له لوري په خپره شوې خبرپاڼه کې راغلي، چې د ګرديز د ابراهيم خيلو د عظمي په سيمه کې د د ماين چاودنې له کبله دوه تنه وژل شوي دي.
همدارنګه په خبرپاڼه کې راغلي، د مرکز ګرديز د ابراهيم خيلو په سيمه کې د پوليسو په رينجر موټر چاوده شوې چې په ترڅ کې يې دوه پوليس وژل شوي او دوه تنه نور ټپيان دي.
