(کابل ټکی کام ۱۳۹۷ غویی ۲۷)
راپور تاژ: فرید افغان
وړمه ورځ طالبانو د فراه ولایت مرکز په نښه کړ او د ولایت د نیولو لپاره یې کرۍ ورځ په داسې حال کې جګړه وکړه چې له هوا او ځمکې څخه ورسره زرګونه بهرني او افغان پوځیان په مقابله بوخت و.
طالبانو که څه هم ونه کړای شول چې د امنیې قوماندانۍ او د ولایت مقام را خپل کړي خو د ملي امنیت ریاست په ګډون یې څو مهم نظامي پنډغالي ونیول.
جګړه له کومه:
اصلاً خو په ټول هیواد کې د جګړې ریښې د امریکایي بریدونو له راتګ سره وپنځول شوې طالبان وځپل شول او مشروع حکومت یې د امریکایي تاړاک ښکار شو.
طالبان په خپلو اعلامیو کې له پیله ټینګار کوي چې افغان پوځیان دې د امریکایانو مدافعین نه جوړیږي، د دوی مخه دې نه نیسي او لږ تر لږه باید د هغوی له ادرسه پر دوی برید ونه کړي .
خو حکومت بیا نړیوال ځواکونه د ملګرو ملتونو تر منشور لاندې بلل شوي میلمانه بولي او د ملي یووالي د حکومت مشرتابه په ځلونو ویلي کړی چې دوی د نړیوالو د ګټو د خوندیتابه په خاطر قرباني ورکوي.
د فراه جګړه:
په فراه کې هم له پیله جګړې روانې دي په وروستیو کې د ولایت ۹۰ سلنه حاکمیت طالبانو ترلاسه کړی او د مرکز په ګڼو سیمو واکمن دي .
ولې مرکز هدف شو؟
ځایي خلک وایي چې د پخواني والي تر تګ وروسته نوي ګمارل شوي والي بصیر سالنګي د تیرې میاشتې اعلان ډیری ولسي خلک وهڅول تر څو د حکومت پر وړاندې دریځ ونیسي.
والي سالنګي تیره میاشت د بالابلوک خلکو ته چې زرګونه کورنۍ کیږي ګواښ وکړ چې یا دې کورونه پریږدي او یا دې د ناټو ځواکونو هوایي بمباریو ته ځان ټینګ کړي،د سیمې قومي مشران څوځله والي ته ورغلل چې تر هغه دې ورسره لار یوسي ، ترڅو د دوی رسیدلي کښتونه وریبل شي ځکه د دوی په وینا چې اوس وخت کې عملیات د دوی لپاره ګڼ تاوانونه راولاړولی شي، خو والي یواځې د بهرنیانو د بمباریو ګواښوونکې خبرې خلکو ته تکرارولې چې په غبرګون کې یې نه یواځې د بالابلوک ،بلکې د ګڼو نورو ولسوالیو خلک هم وهڅیدل ترڅو د حکومت خلاف دریځ ونیسي.
رسنیز پروپاګند:
که څه هم له پیله دولتي ویاندویانو د هیواد په کچه د پیښو ریښتونی انځور خلکو ته نه دی وړاندې کړی خو د فراه په اړوند یې تر بل هر وخت نه رسنیزې اوفکري جګړې ته زور ورکړ.
د حکومت ویاندویانو د جګړې پر لومړۍ ورځ چې طالبانو د ښار په چوک کې تلاشي کوله، زیاته کړه چې تازه دمو ځواکونو یې طالبان له فراه څخه درۍ کیلو متره لرې ځغلولي ،خو د ولایتي شورا رئیس فرید بختور سملاسي دا خبر رد کړه او زیاته یې کړه چې دولتي ویاندویان د جعلي انځورونو په خپرولو سره پروپاګند کوي.
د ایران مسئله:
دولت پلوه فعالانو او رسنیزو ادارو پر دولتي ځواکونو د پردې اچولو او د طالبانو د ځواک پیکه کولو پخاطر یوه بله ناندریزه اوازه هم خپره کړه چې هغه د ایران مستقیمه مرسته وه له طالبانو سره.
سیمیزو سرچینو کابل ټکی کام ته وویل؛ دلته طالبان یواځې هغه وسلې کاروي چې له دولتي ځواکونو یې نیولې، طالبانو ته د هیڅ هیواد ملاتړ نه دی رسیدلی ا تر ډیره ولسي خلکو د طالبانو په ملتیا خپلو وسلو سره رادانګلي دي.
دا خبر هغه وخت دروغ ثابت شو، کله چې د ملي دفاع وزیر اقرار وکړ چې ایران له طالبانو سره هیڅ مادي او معنوي ملاتړ نه لري.
اهداف:
وړاندې مو وویل چې د طالبانو هدف بهرني اشغال ته د پای ټکی ایښوودل دي، نو بناً طالبان هڅه کوي ترڅو د هغوی داخلي ملاتړ هم تر دې کچې وځپي چې بیا هغوی(بهرنیانو) ته د پښې ایښودلو موقع هم برابره نه شي.
د سیاسي چارو کارپوه وحید مژده وایي؛ طالبان غواړي د ولایتونو او ولسوالیو په سقوط سره بهرنیانو ته دا پیغام ورسوي چې هغوی هیڅکله افغان جګړه نه شي ګټلی او نه یې هم داخلي ملاتړ دومره روحیات لري چې د دوی د ګټو د خوندیتابه په موخه دلته طالب ضده جګړه مخته یوسي.
تلفات:
که څه هم د فراه والي تیره ورځ ۳۰۰ طالبانو ته د مرګ ژوبلې اوښتلو ادعا کړې وه، خو د دې ولایت لایتي شورا بیا داشمیر نه دی منلی او طالبانو ویلي چې یواځې ۹ تنه یې وژل شوي او ۱۱ نور ټپیان دي.
بل پلو فرید بختور وایي چې په تیرو څو ورځو کې نږدې ۵۰ امنیتي ځواکونو ته مرګ ژوبله اوښتې ده.
