پاکستاني رسنيو د دغه هيواد په کراچۍ ښار کې د ګرمي د لوړې درجې له امله د لسګونو کسانو د مرګ خبر ورکړی.
د دې هيواد د هواشناسۍ ادارې له قراره د تيرې هفتې ورځې راهيسې په کراچۍ ښار کې د ګرمي درجه ۴۴ سانتيګراد ته لوړه شوې ده چې له امله يې تر اوسه پورې ۶۵ کسانو خپل ژوند له لاسه ورکړی دی.
د کراچۍ ښار په کورنګي او سهراب ګوټ سيمه کې د ايدي سردخانو مشر فيصل ايدي جنګ ورځپاڼې ته ويلي چې په تېرو دوو ورځو کې يې خپلې مرده خانې ته ۱۵۰ مړي ورړل شوي چې په دوی کې ۶۵ تنه يې د ګرمۍ د شدت له امله مړه شوي دي.
فيصل ايدي جنګ ورځپاڼې ته ويلي چې د ګرمۍ له امله ډير مړه شوي کسان غريب کار او مزدورکار وګړي دي.
د پاکستان د هواشناسۍ ادارې د کراچۍ ښار اوسيدونکو ته خبرداری ورکړی چې روانه هفته کې له ګرمۍ ځان وساتي، د يادې ادارې د اټکل له مخې د ګرمۍ شدت به تر راتلونکي اونۍ دوام ولري او د سانتيګراد درجه به له ۴۰ تر ۴۳ پورې وي.
تير کال هم د دغه هيواد په کراچۍ او ځينو نورو ښارونو کې د تودوخي د شديدې څپې له امله لسګونه کسانو ژوند بايللی وو، خو دا ځل د ګرمۍ شدت د روژ په مبارکه مياشت کې ريکارد کچې ته لوړ شوی، چې د هوا پېژندنې ادارې له مخې ښايي له امله يې د مرګونو کچه تر دې هم لوړه شي.
