کندهار: د ملي امنيت پر ځواکونو موټربم چاودنه شوې
(کابل ټکی کام، ۱۳۹۷، غبرګولی ۱) شاوخوا يو ساعت مخکې د کندهار ولايت د څوارلسمې امنيتي حوزې مربوط د کنډوالې سراس سره نږدې چاودنه وشوه چې له کبله يې لسګونه کسانو ته مرګ ژوبله اړولې ده.
ځايي امنيتي سرچينې وايي، چاودنه د هغه تونس موټر په واسطه شوې چې چاودېدونکي توکي پکې ځای پرځای شوي و او د ملي امنيت ځواکونو له لوري کشف شوی و.
د سرچینې په وينا، د ملي امنيت ځواکونه يې د خنثی کولو پر عملياتو بوخت و چې یاد موټربم پرې وچاودېده.
د کندهار د والي ویاند داود احمدي پېښه تاييدوي وايي، په یاده چاودنه کې د ملي امنيت د سرتيرو په ګډون ولسي وګړو ته هم مرګ ژوبله اوښتې ده خو د کره شميرو په اړه يې معلومات نه دي ورکړي.
ويل کېږي، په چاودنه کې د ملي امنيت سرتيرو ته هم درنده مرګ ژوبله اوښتې خو تر اوسه يې په اړه کره معلومات نه دي ورکول شوي.
د کندهار ميرويس حوزوي روغتون چارواکي وايي، تر دې دمه د چاودنې له ځای څخه له شلو زيات ټپيان او د درې کسانو جسدونه وروړل شوي دي.
د چاودنې مسئولیت تر اوسه چا په غاړه نه دی اخيستی.
