سپینه ماڼۍ وايي چې د امریکا ولسمشر ډونلډ ټرمپ د شمالي کوریا له مشر کیم جونګ اون سره خپله پلان شوې لیدنه لغوه کړې.
ډونلډ ټرمپ ویلي د شمالي کوریا د ”سخت عصبانیت او ښکاره دښمنۍ“ له امله اوس مهال په سنګاپور کې د یو بل لیدل نامناسب دي.
ښاغلي ټرمپ د خپل لیک په پیل کې د کیم ”له وخت ورکولو، صبر او هڅو“ مننه کړې او ویلي یې دي چې له ده سره لیدو ته لېوال دی خو د شمالي کوریا وروستیو څرګندونو د لیدنې په مخ کې خنډ جوړ کړی دی.
د امریکا ولسمشر همداراز د شمالي کوریا مشر ته لیکلي: ”تاسې د خپل اټومي ځواک خبره کړې ده، موږ چې څه لرو دومره ځواکمن دي چې زه خدای ته دعا کوم چې هیڅکله هم استعمال نه شي.“
ډونلډ ټرمپ ویلي که شمالي کوریا خپل فکر او نظر بدل کړي کېدای شي بېرته د دواړه مشرانو یو بل سره غونډه وشي.
ټاکل شوې وه چې ټرمپ او کیم جونګ اون د راتلونکې جون میاشتې پر ۱۲مه نېټه په سنګاپور کې یو بل سره وویني.
شمالي کوریا تېره اوونۍ یو ځل بیا امریکا ته ګواښ کړی و چې د دواړو هېوادونو د مشرانو غونډه به لغوه کړي.
ویل کېږي چې شمالي کوریا دا ګواښ د ډونلډ ټرمپ د مرستیال، مایک پنس، د خبرو په غبرګون کې کړی و. پنس ویلي و که شمالي کوریا سره د غیراټومي کولو پر سر توافق ته ونه رسېدل نو ”د لیبیا له نسخې“ به کار واخلي.
د ”لیبیا موډل“ په ۲۰۱۱ز کال کې پر دې هېواد د امریکا او د متحدینو پوځي برید ته اشاره کوي، چې په پایله کې یې د معمر قذافي رژیم سقوط شو او پخپله قذافي هم ووژل شو.
شمالي کوریا د لیبیا د نسخې په اړه د مایک پنس خبرې ”احمقانه“ بللې دي.
