راپورتاژ: فرید افغان
په داسې حال کې چې طالبانو د نویو عملیاتو په پیل سره د هیواد په ګوټ ګوټ امنیتي ځواکونو او د افغان حکومت او امریکایانو ګډې حکومتولۍ ته خنډونه جوړ کړي، په غزني ولایت کې هم د نورو ولایاتو په څیر د افغان ځواکونو د نصرت په نامه عملیات له ستونزو سره مخ او شاتګ ته اړ شوي دي.
د غزني والي کربم متین وایي؛ د طالبانو د پرمختګ لوی لامل دادی چې غوڅ اکثریت خلک یې همکار دي او له هغوی څخه ملاتړ کوي.
هغه چې نن ورځ د مدني فعالانو یوې غونډې ته خبرې کولې وویل؛ ولسي خلک طالبانو ته ډوډۍ، لباس او آن وسلې ورکوي او ترڅنګ یې هغوی ته د دولتي کسانو پرضد له کوم معاش او امتیاز پرته جاسوسي کوي.
متین زیاته کړه؛ د غزني خلکو په ټولیزه توګه له دولت سره اړیکې پریکړې او له مرکزي حکومت نه یې د پوره همکارۍ غوښتنه وکړه.
هغه وروسته تر دې داخبرې کوي چې طالبانو د تیرې یوې اونۍ په ترڅ کې د غزني درۍ ولسوالۍ (جغتو،دهیک ،اجرستان) ونیولې او ګڼو امنیتي ځواکونو ته د مرګ ژوبلې اړولو سربیره یې ګڼ امنیتي پرسونل او تجهیزات له ځانه سره یووړل.
په ولسي جرګه کې د غزني استازي ټبنګار کوي چې د غزني مرکز د سقوط وروستۍ شیبې شمیري او که مرکزي حکومت ورته توجه ونه کړي، ښایي په لنډه موده کې د طالبانو لاس ته ولویږي.
بلخوا د کورنیو چارو وزارت هم د طالبانو نوي پیل کړي عملیات خطرناک بولي او خبرداری ورکوي چې که د دې ډلې د بریدونو څپې همداسې ګړندۍ روانې وې، دوی اړ دي تر څو مستقیماً له نړیوالې ټولنې د مداخلې غوښتنه وکړي.
اویس برمک دا ګواښ داسې مهال کوي چې اوسمهال د ۱۵ زرو امریکایي ځواکونو سره سره د لسګونو هیوادونو هوایي او ځمکني قوتونه عملاً د جګړو په کرښو کې د افغان ځواکونو تر څنګ د طالبانو پر وړاندې جګړه مخته وړي.
دولتي ځواکونه هم چوپ نه دي ناست او په رسنیز ډګر کې یې د ګڼو پر مختګونو ادعاوې کړې.
د ۲۰۳ تندر قول اردو مطبوعاتي خبرپاڼه وایي چې تیره ورځ یې د دهیک ولسوالۍ په مربوطاتو کې د توپچي بریدونو کړي چې ۱۵ وسلوال طالبانو ته یې مرګ ژوبله اړولې هغه ادعا چې طالب ویاند ذبیح الله مجاهد یې ردوي او زیاتوي چې “ د امنیتي ځواکونو د توپچي هدف ولسي خلک او عام کلي وي، مجاهدین ثابت مواضع نه جوړوي چې د توپچي هدف وګرځي.“
بلخوا د همدې قول اردو په خبرپاڼه کې ادعا شوې چې په غزني کې د طالبانو دو موټرسایکلونو ټکر کړی او دوه وسلوال طالبان ځای پرځای وژل شوي، سیمیزې سرچینې په دې تړاو بې خبري ښیي.
بل پلو طالبانو ټولو افغان ځواکونو ته د عمومي عفوې مشروط اعلان کړی هغه څه چې په نړیوالو رسنیو کې یې زیات خبري پوښښ خپل کړ
په دې لړ کې طالبانو د غزني په اندړو کې خپلې ارتباطي شمیرې هم ابلاغ کړې او ټینګار یې وکړ چې دوی به هیڅکله د هغه چا پر ضد کوم څه تر سره نه کړي، څوک چې د دوی په مقابل کې له وسلوالې مبارزې لاس واخلي.
په ورته وخت کې طالبانو د غزني- پکتیکا لار لا هم د دولتي ځواکونو پر مخ تړلې او خلک لا هم په نږدې فروعي لارو مزل کوي، دولتي ځواکونو په ټول توان سره هڅه وکړه چې لار خلاصه کړي خو لا هم نه دي توانیدلي.
