(کابل ټکی کام ۱۳۹۷ غبرګولی ۴)
راپورونه وایي چې د فراه ولایت په فراه رود ولسوالۍ کې ګډوځواکونو پر طالبانو چاپه وهلې چې له متقابل غبرګون سره مخ او مرګ ژوبله ورته اوښتې.
طالب ویاند قاري یوسف احمدي ادعا کوي چې د یادې ولسوالۍ په تودنکانو سیمه کې یې د ګډو ځواکونو د عملیاتي قوې دوه امریکایی عسکر ځای پر ځای وژلي.
نوموړی زیاتوي؛ “ وروسته خارجي او داخلي ګډو عسکرو د عامو خلکو تر ۵۰ پورې کورنه ونړول، ګڼ درمندونه يې وسوزول ۱ ملکي کس يې چې د بیسیم شبکي ساتونکی وو شهید کړ.“
د فراه ځایي چارواکو او د ایساف ځواکونو مرکزي قوماندانۍ په دې تر اوسه څه نه دي ویلي.
دا په داسې حال کې ده چې په دې وروستیو کې امریکایي ځواکونو په دې ولایت کې یوځل بیا د طالبانو پر و اندې جګړو ته رادانګلي او په لومړیو کرښو کې له افغان ځواکونو سره اوګه په اوګه جګړه کوي.
په یو بل خبر کې ویل شوي چې ګډوځواکونو د لوګر ولایت د برکي برک او څرخ ولسوالیو کې د ملکي خلکو کورونه په هوانونو ویشتلي چې د څو کورونو د نړیدو سربیره ۳ تنه ولسي کسان وژل شوي دي.
طالبانو پیښه جنایت بللی خو د لوګر چارواکو په دې تړاو تر اوسه کومه تبصره نه ده کړې.
