(کابل ټکی کام، ۱۳۹۷، غبرګولی ۷) د افغانستان د کورنيو چارو د وزارت له وسله تون څخه ۷۳ میله وسلې او د شپې دوربنيونه غلا شوي دي.
د طلوع نيوز د راپور پر بنسټ چې وايي دوی ته اسناد رسېدلي، د کورنيو چارو وزارت له وسله تون څخه وسلې غلا شوي دي خو د کورنيو چارو وزارت د غلا شويو وسلو تعداد يواځې ۸۶ میله تفنګچې او درې د شپې دوربينونه ښودلي دي.
د کورنيو چارو وزازت وياند نجيب دانش له وزارت څخه د وسلو غلا کېدل تاييدوي وايي “ټولې ۸۶ ميله تفنګچې غلاشوي چې په تړاو يې دولس کسان نيول شوي، له غلا شويو تفنګچو نوولس ميله پيدا شوي او ۶۴ لا هم ورکې دي.”
که څه هم د کورنيو چارو وزارت ويلي، چې دغه وسلې پخوانۍ دي خو طلوع نيوز وايي چې دوی ته رسېدلي اسناد ښيي چې يادې تفنچګې او دوربينونه امريکايي ساخت او نوي دي.
دا لومړی ځل نه دی چې د کورنيو چارو وزارت له وسله تون څخه د وسلو د غلا راپور ورکول کېږي بلکې تر دې مخکې هم د فسادضد ادارو ويلي چې دغه وزارت تر وروستۍ کچې په فساد کې ښکېل دی.
ويل کېږي، د افغانستان پوځ مربوط نظامي کسان او چارواکي د وسلو له ډيپوګانو قيمتي امریکايي تفنګچې او نورې وسلې غلا کوي او په بدل کې يې په تور بازار کې ورته ډول وسلې جوړوي او بیرته يې وسله تون ته سپاري.
