کندهار: د ملي اردو وسایطو جوړولو پر مستريانو چاودنه شوې
په کندهار ښار کې چاودنې شپاړلس کسانو ته مرګ ژوبله اړولې ده
(کابل ټکی کام، ۱۳۹۷، غبرګولی ۹) د کندهار ښار د پنځمې ناحيې مربوط د ميوې مارکېټ ترڅنګ د ملي اردو د موټرو پر مستريانو چاودنې شپاړلس کسانو ته مرګ ژوبله اړولې ده.
ويل کېږي، په دغه چاودنه کې د ملي اردو د وسایطو جوړولو درې مستريان وژل شوي او څو تنه نور سخت ټپيان دي.
ځايي سرچينې وايي، چاودنه نن سهار هغه مهال رامنځته شوې کله چې د يادو مستريانو موټر د تېرېدلو په حال کې و.
د کندهار د والي وياند داود احمدي پېښه تاييدوي وايي، په چاودنه کې درې کسان وژل شوي او ديارلس تنه نور ټپيان دي.
د کندهار د ميرويس روغتون مسئولين وايي، د پېښې له ځايه ديارلس ټپيان وروړل شوي چې د شپږ کسانو روغتيايي وضعيت ښه نه دی.
تر اوسه د چاودنې مسئوليت چا په غاړه نه دی اخيستی.
