(کابل ټکی کام ۱۳۹۷ غبرګولی ۱۰)
د افغانستان او متحده عربي اماراتو چارواکو تیره ورځ د کارګرانو په برخه کې یو مهم تفاهم وکړ چې له مخې به یې افغان کارګرانو ته په دې هیواد کې سهولتونه برابریږي.
یاد تړون د افغانستان د کار او ټولنیزو چارو د وزیر فیض الله ذکي او د اماراتو د بشري منابعو وزیر ناصر بن الثاني الحلیمي تر منځ د سویس په ژینوا ښار کې د کارګرو په ۱۰۷ م نړیوال کنفرانس کې لاسلیک شو.
د تړون تر مخه به افغان کارګر د متحدو عربو اماراتو د بشري منابعو د تګلارې په اساس ګمارل کیږي او ټول حقوق به یې د یاد وزارت پر غاړه وي.
همداراز که د افغان کارګرو او اړوندو شرکتونو تر منځ ممکنه ستونزه مخته راتله باید یاد وزارت یې حل کړي او که نه شو بیا به یې د دې هیواد د عدلیې وزارت حلوي.
اماراتي وزیر الحملي دا تړون د موقتي قراردادونو په برخه کې د افغان کارګرانو لپاره اغیزناک وباله.
افغان وزیر هم له اماراتي سیال څخه مننه کړې او ویلي یې دي چې اماراتو ورسره ژمنه کړې چې له دې وروسته به په مسلکي او تخنیکي برخه کې د افغان کارګرانو جذب زیات کړي.
