(کابل ټکی کام، ۱۳۹۷، غبرګولی ۱۳) د فراه ولايت څخه ځايي سرچينې وايي، د ولايتي چارواکو اړيکي د پرچمن ولسوالۍ سره قطعه شوي او ويل کېږي چې ولسوالۍ د طالبانو لاسته لوېدلې ده.
طالب وياند قاري يوسف احمدي رسنيو ته په لېږلې خبرپاڼې کې ويلي چې د یادې ولسوالۍ ولسوال حاجي داود، د امنيې قومندان عبدالولي، د استخباراتو مدير عبدالظاهر د ولسوالۍ له ټول پرسونل سره طالبانو ته تسليم شوي دي.
خبرپاپه کې راغلي د ولسوالۍ د نيولو پر مهال: ” په ولسوالۍ کې ګڼ شمیر هاموې ټانکونه، رینجر موټر، خورا ډيرې سپکې اودرنې وسلې مهمات او نظامي توکي مجاهدینو ته په لاس ورغلل.”
طالبان وايي، د دغه ولسوالۍ په نيولو سره زياته سيمه د دوی تر واک لاندې راغله او د ولسوالۍ مربوط په ټولو مرکزونو کې طالبان ځای پرځای او امنيت ټينګ کړای شو.
تر اوسه دولت رسمي څرګندونې نه دي کړي خو محلي سرچينې وايي چې د ولايت او ولسوالۍ تر منځ اړیکې پرې شوي او په ياده ولسوالۍ کې د وضعيت په اړه هيڅ خبر نه لري.
د طالبانو د الخندق عملياتو له پيل راهيسې دا لسمه ولسوالۍ ده چې طالبان يې نيسي، پوليسو ته مرګ ژوبله اوړي او د هغوی وسلې طالبان له ځان سر وړي خو دا لومړۍ ولسوالۍ ده چې ولسوال، امنيې قومندان او د استخباراتو د مدير په ګډون يې ټول پرسونل په خپله خوښه طالبانو ته تسليميږي او ټولې وسلې، وسايط او نطامي توکي طالبانو ته سپاري.
