(کابل ټکی کام، ۱۳۹۷، غبرګولی ۱۵) د ننګرهار ولايت د پوهنې رياست مسئولين وايي، په دغه ولايت کې يې د کلنۍ رخصتيو له رارسېدو وړاندې سلګونه ښوونځي تړلي ځکه په وينا يې داعش ډلې ورته ګواښونه کول.
د ننګرهار د پوهنې رياست مطبوعاتي مسوول محمد اصف شینواري رسنيو ته وويل، په ځينو ښوونځيو کې د کلنۍ ازموينې مضامين هم پاتې دي خو زياتوي چې د ( غبرګولي له ۱۵ مې) د ممکنه خطر له امله ازموينې ځنډول شوي او د انجونو او هلکانو د تودو سیمو ټول ښوونځي رخصت شوي دي.
د ځايي رسنيو د راپورونو له مخې، د تېرې شنبې په ورځ د داعش راډيو په ننګرهار کې په ښوونځيو د بريدونو ګواښونه کړي او تازه د هغوی له لوري په يوه اعلاميه کې راغلي، (ځکه پر ښوونځيو بريدونه کوي چې بهرنيو ځواکونو په هسکه مېنه او ځينو نورو ولسوالیو کې د خپلو بريدونو پر وخت ملکي وګړي او دغلته د بهرنيانو کورنۍ په نښه کوي.)
په عين حال کې نن سهار مهال د غني خيلو ولسوالۍ د شيرګړ د نجونو په ښوونځي کې چاودنه شوې خو چاته پکې زيان نه دی اوښتي.
څو مياشتې مخکې په ننګرهار کې د حکومت او داعش تر واک لاندې سيمو کې ښوونځي وسوځول شول چې د ځايي سرچينو پر اساس په دغه سوځونه کې د سيمې د معارف کسان او محلي چارواکي ککړ ښودل شوي و.
ډير کله حکومتي سرچينو د هېواد په ځينو سيمو کې د ښوونځيو سوځول د طالبانو کار بللی خو طالبانو هر ځل د چارواکو دغه ډول ادعاوې رد کړي وايي، طالبان تر خپل واک لاندې سيمو کې ټول ښوونځي پرانيستي او د هغوی نظارت او څارنه کوي ترڅو ښوونکي په تدريسي چارو کې ناغيړي ونه کړي.
داعش ډله له تېرو درو کلونو راهيسې د ننګرهار په شاوخوا پنځو ولسواليو کې فعالیت او وسله وال بريدونه کوي چې ډيری وخت يې په حملو کې ملکي خلکو ته ځاني او مالي زيانونه اوړي.
