(کابل ټکی کام، ۱۳۹۷، غبرګولی ۲۰) د جلال اباد ښار اړوند ميدان هوايي ته څېرمه د امريکايانو د ګزمې پر يوه ټانګ د ماين چاودنې پوځيانو ته مرګ ژوبله اړولې ده.
سيمې ته نږدې سرچينې وايي، چاودنه پرون د ماښام او ماسختن تر منځ له تيارې څخه په استفاده امریکايي ټانګ ته نږدې شوې چې له کبله يې ټانګ ويجاړ شوی او ورسره نږدې عسکرو ته مرګ ژوبله اوښتې ده.
سرچينه زياتوي، له چاودنې وروسته امريکايي ځواکونو د لګ وخت لپاره لاره وتړله په پېښه کې ټپي او وژل شوي عسکر او ویجاړ ټانګ يې هوايي ډګر ته دننه کړل.
تر اوسه په چاودنه کې د اوښتو تلفاتو په اړه په افغانستان کې ميشتو بهرنيو ځواکونو څه نه دي ويلي.
طالبانو د چاودنې مسئوليت منلی او وياند يې ذبيح الله مجاهد وايي، د هوايي میدان مخې ته د امریکايي ځواکونو په زغره وال ټانګ چاودنه شوې چې په ترڅ کې يې دوه امریکايي افسران وژل شوي او درې تنه نور ټپيان دي.
ډير کله د طالبانو له لوري پر بهرنيو ځواکونو چاودنې او سرتيري بريدونه کېږي چې هغوی ته پکې درنه مرګ ژوبله اوړي خو بهرنيان يې د خپلې پاليسۍ له مخې نه اعلانوي.
