(کابل تکی کام ۱۳۹۷ غبرګولی ۲۶)
له ننګرهار څخه راپورونه وایي چې، نن مازیګر پنځه بجې د ننګرهار روداتو ولسوالۍ د غازي امان الله خان ښارګوټي کې طالبانو ولسي خلکو او امنیتي ځواکونو د اوربند خوښي لمانځله چې زوروره چاودنه پرې شوې.
لومړني مالومات ښیي چې چاودنه د طالبانو پر موټر شوې چې په کې تر ۱۲ ډیر طالبان او ولسي کسان وژل شوي او تر ۳۰ زیات ټپیان دي.
د ننګرهار د والي ویاند عطاؤالله خوږیاڼی د پیښې په تائید سره وایي چې چاودنه د طالبانو په موټر کې د چاودیدونکو توکو له امله رامنځته شوې او زیاتوي چې د پیښې په تړاو به وروستي جزئیات وروسته رسنیز کړي.
تر اوسه د برید مسؤلیت کومې وسلوالې ډلې نه ده منلې خو په یاد ولایت کې داعش ډله هم فعالیت لري.
