(کابل ټکی کام ۱۳۹۷ غبرګولی ۲۶)
د ګډحکومت مشر جمهور رئیس داکټر اشرف غني نن مازدیګر مهال په یوه خبري کنفرانس کې په ډاګه کړه چې د اختر تر څلورمې وروسته به خپلو ټولو ځواکونو ته د اوربند د تمدید حکم وکړي، خو هیله یې څرګنده کړه چې طالبان هم باید ورته چاره تر سره کړي.
غني وویل، فکر یې نه کاوو چې دا اوربند به دومره عملي بڼه ولري “ مونږ ویل، اول به طالبان دا ونه منی، بل به دا څنګه عملی کېږی؟“
خو په وینا یې چې، له اوربند سره دا شکونه او ابهامات ختم شول او همدارنګه له اوربند سره د ډېرو سیاسیونو او تحلیلګرانو فرضیې غلطې ثابتې شوې.
اشرف غني وویل، په نړیواله کچه د اوربند او سولې په تړاو ځانګړي قوانین شتون لري، خو افغانانو نړۍ ته د عملي اوربند یوه نوې او حیرانونکې تجربه وړاندې کړه.
هغه د طالبانو او امریکایي ځواکونو تر منځ د مخامخ مذاکراتو په باب بیا هم څه ونه ویل، خو زیاته یې کړه چې “موږ همهجانبه سولې او مذاکراتو ته حاضر یوو، ټول هغه مسائل او غوښتنې چې د طالبانو او افغان حکومت له خوا مطرح شوی دی، د سولې د مذاکراتو په وخت کې پرې هر اړخیز بحث ته حاضر یوو. د افغانستان حکومت د ګاونډیو هېوادونو له نقش نه نیولې د بهرنیو پوځیانو د حضور، نقش او راتلونکی سرنوشت په سر بحث ته چمتو دی.“
اشرف غني ویلي، لویې څارنوالۍ د اوربند د احترام په خاطر پرون۴۶ تنه طالبان له زندانه ازاد کړي.
نوموړی داسې مهال دا څرګندونې کوي چې تیره ورځ یې د سولې په تړاو او د وسلوالو پر ضد د ګډې مبارزې په برخه کې د پاکستان د پوځ له مشر څخه د مرستې غوښتنه کړې وه، چې په ټولنیزو رسنیو کې یې توند غبرګونونه را وپارول او خلکو پر نوموړي دا نیوکې کولې چې ګواکې په لوی لاس خپل افغان طالبان پردیو ته منسوبوي چې په دې سره د هغوی لا نفرت زیاتیږي.
د سیاسي چارو کارپوه وحید مژده امریکا غږ ته ویلي؛ طالبان له خپلې غوښتنې څخه، چې له امریکایانو سره د مخامخ خبرو کول دي ، تیر شوي نه دي او هغوی لا هم افغان حکومت یو بې صلاحیته حکومت ګڼي”.
