(کابل ټکی کام ۱۳۹۷ غبرګولی ۲۷)
طالبانو خپل درۍ ورځنی اوربند چې په کامله امنیتي فضا کې تر سره شوه او د هیواد په مختلفو سیمو کې د ولسونو له تود هرکلي سره مخ شو، پای ته ورساوو.
طالبانو خپلو ټولو افرادو ته لارښوونه کړې چې تر نن ماښام وروسته د بهرنیو پوځیانو او د هغو افغان ځواکونو چې د بهرنیانو ملاتړ کوي، پر ضد د په پخوا په شان خپلو عملیاتو ته دوام ور کړي.
طالبانو ویلي؛ اوربند یې د ګډحکومت د اوربند په غبرګون کې نه و ، اعلان کړی بلکې د ولس د هوساینې په خاطر یې دا اقدام کړی و.
اعلامیه زیاتوي؛ اوربند په بریالیتوب پای ته ورسیده او دا یې ثابته کړه چې اسلامي امارت د روان جهاد او مبارزې واک او قوت په اختیار کې لري، هیڅ بهرنی لاس ورسره نشته او صف يې هم متحد او یو موټی دی.
طالبانو ویلي چې د اوربند پر مهال یې د ګډحکومت ټولو نظامي او غیر نظامي چارواکو ته ښه فرصت ورکړ چې دوی په ښه توګه وپیژني او د بهرنیو ځواکونو له ملاتړ څخه لاس په سر شي.
دې ډلې ویلي چې ټولې پریکړې او تصامیم د اسلامي شریعت په رڼا کې ترسره کوي او پر امریکایي ځواکونو یې ژغ کړی چې “د روانې معضلې د هواري لپاره دې مخامخ له اسلامي امارت سره د دیالوګ لاره غوره کړي اوخپل اشغالګر ځواکونه دي له افغانستان څخه وباسي.“
طالبانو واضحه کړې چې له افغان حکومت سره یې هیڅ پټ او ښکاره مذاکرات نه دي کړي او په دې اړه ټول خپریدونکي او نشر شوي راپورونه شوي او اوازې کوم اساس نه لري.
د طالبانو د اعلامیې بشپړ متن
د اختر په مناسبت د ۳ ورځني اوربند د پای ته رسیدو په اړه د اسلامي امارت اعلامیه
د دې لپاره چې هېوادوال مو د اختر مراسم په ښه او آسانه توګه تر سره کړي اسلامي امارت په ټول هیواد کې د ۳ ورځو لپاره اوربند اعلان او په بریالیتوب سره پلی کړ، دا اوربند د کابل ادارې داوربند په مقابل کې نه و بلکې د ولس د هوسایۍ په خاطر اعلان شوی چې نن ماښام یاد اوربند پای ته رسیږي .
نور په ټول هیواد کې مجاهدینو ته امر کیږي چې د بهرنیو اشغالګرو او د هغوی د کورنیو ګوډاګیانو په ضد د په پخوا په شان خپلو عملیاتو ته دوام ور کړي.
په تیرو دریو ورځو کې د اوربند په ښه توګه تطبیق لاندې ټکي ښکاره او په ګوته کړل:
ــ دا خبره ثابته شوه چې اسلامي امارت د روان جهاد او مبارزې واک او قوت په اختیار کې لري، هیڅ بهرنی لاس نشته ورسره، صف يې متحد او یو موټی دی، چې د اوربند په څیر مهمو موضوعاتو په اړه هم پریکړه کولی او عملي کولای شي.
ــ اسلامي امارت د کابل ادارې ټولو نظامي او غیر نظامي افرادو ته یو ښه فرصت ورکړ چې د اسلامي امارت مجاهدین په صحیح معنا وپيژني او د امریکايي ملاتړ څخه لاس واخلي، ترڅو مو هېواد د بهرني اشغال له شر څخه وژغورل شي او په ټول هېواد د اسلامي نظام اقامې ته لاره پرانستل شي.
ــ په تیر کې زموږ دښمنانو تبلیغات کړی وو چې په افغانستان له دوی سره شل ډلې جګړه کوي او یاداچې اسلامي امارت یوه خوله او یو صف نه دی، مګر اوس ټولو ته د لمر په ډول څرګنده شوه چې دا ادعا غلطه وه او دجهاد په صف کي متعددي ډلي نشته، اسلامي امارت په ټول هېواد کې د جهاد رهبري په لاس کې لري او افراد يې کلک اطاعت کوي.
ــ د اسلامي امارت لخوا د اوربند اعلان، عملي کیدو، له مجاهدینو څخه پراخ ولسي ملاتړ او هرکلي دا خبره ښکاره کړه چې د اسلامي امارت او ځوریدلي اولس داعیه یوه ده، ټول د بهرني اشغالګرو وتل او د اسلامي نظام اقامه غواړي.
ــ د اسلامي امارت لخوا ټولې پریکړې د شریعت په اساس او د اولس په ګټه ترسره کیږي، د هېواد بشپړه آزادي او دلته د سوچه اسلامي نظام اقامه زموږ د شریعت حکم او د ملیونونو شهیدانو، یتیمانو، ګونډو او بورو تر ټولو لوړ آرمان دی چې په هيڅ ډول او د هیڅ امتیاز په بدل کې به پرې معامله ونشي.
ــ امریکايي اشغالګر جهت نور باید حقائق درک او ومني، له بې ځایه سرتمبګۍ څخه دي لاس واخلي، د روانې معضلې د هواري لپاره دې مخامخ له اسلامي امارت سره د دیالوګ لاره غوره کړي اوخپل اشغالګر ځواکونه دي له افغانستان څخه وباسي.
ــ ټول هیوادوال او مجاهدین دې خبر وي چي د کابل له ګوډاګۍ ادارې سره هیڅ راز ښکاره او پټ مذاکرات جریان نه لري، په دې اړه چې مخالف لوری څومره بي اساسه تبلیغات او دعامه اذهانو د تیر ایستلو هڅه کوي، هغه نور هم روان بهران پیچلی کوي او د سولې په اړه د ګټي په ځای تاوان کوي.
د افغانستان اسلامي امارت
۱۴۳۹/۱۰/۳هـ ق
۱۳۹۷/۳/۲۷هـ ش
2018/6/17م
