تبصره
له تېرو درې ورځو راهيسې، په میدان وردګ ولايت کې د طالبانو او حکومتي پوځونو تر منځ سختې جګړې روانې دي. دا سختې جګړې هغه وخت پیل شوې کله چې طالبانو په ياد ولايت کې پر لسو امنيتي پوستو بريدونه پیل کړل او امنيتي پوليسو د مقاومت پر ځاى طالبانو ته له مهماتو ډکې پوستې وسپارلې.
ځايي خلکو ويلي چې د حکومت لخوا د جګړې سيمې ته نورې قواوې ولېږل شوې، خو په لاره کې د طالبانو له مقاومت سره مخ شوې.
د معلوماتو له مخې، حکومتي پوځونه پر ځای د دې چې پر طالبانو بريدونه وکړي او له لاسه ورکړې پوستې ترې ونيسي، د ځان دفاع هم نه شي کولاى. رسنۍ خو له سيمې د حکومتي پوځونو او طالبانو تر منځ د جګړې راپورونه ورکوي، په حقيقت کې په ياده سيمه کې حکومتي پوځونه جګړه نه، بلکې د ځان له دفاع هم ناتوانه دي .
اشرف غني خان په وردګو کې پوستو د ترلاسه ورکولو وروسته خپلو پوځونو ته ويلي چې پر طالبانو رحم ونه کړئ!
عجيبه خبره ده، هغه څوک چې خپله دفاع نه شي کولاى هغه به پر بل څرنګه رحم وکړي؟ که ولسمشر پر طالبانو غږ کړى واى چې زموږ پر پوځ رحم وکړئ، نو پر ځاى غږ ؤ، ځکه چې په تېرو ١٧ کلونو کې اشرف غني د طالبانو جګړې، مقاومت، مېړانه، حوصله، تاکتيکي پرمختګ او د کمکي اختر په ورځو کې اوربند (رحم) هم وليده .
ولسمشر بايد پر طالبانو غږ وکړي چې پر ما او زما پر پوځ رحم وکړئ. طالبان هم افغانان دي او د افغان وينا ته په افغانيت ځواب وايي.. ګوندې پر ولسمشر رحم وکړي او د امريکا له اسارته یې وژغوري، پرافغان پوځ رحم وکړي او پوستو کې یې ونه وژني.
د دفاع وزارت په وينا، په روانه جګړه کې هوايي ځواکونو هم بمباري پیل کړې ده. بيا خو دې ولسمشر د رحم يو غږ پر خپلو او امريکايي هوايي ځواکونو هم وکړي چې په پوستو کې پوليس بمبار نه کړي، پر ولسي وګړو بمبار ونه کړي، د طالبانو په نامه ملکي وګړي بمبار نه کړي، د جګړې سيمې ته څېرمه په بله ولسوالۍ کې د کوم واده په مراسمو بمبار ونه کړي، په کومه نږدې سيمه کې د جنازې په ادا کوونکو بمبار ونه کړي.
ښاغلی ولسمشر! تاسې په داسې وخت کې پر خپلو پوځونو د نه رحم غږ کوئ چې هغوى پخپله رحم ته اړتيا لري. پخپله تاسې هم رحم ته اړتيا لرئ. ټول افغان ولس رحم ته اړتيا لري. نه تاسې نور د جګړې توان لرئ، نه مو پوځ او پوليس، او نه ولس نور د شپنيو عملياتو او ړندو هوايي بمباريو او له کورونو د بې ګناه وګړو د جنازو د پورته کولو توان لري.
ولسمشره! طالبان ستاسې او ستا د بادار (امريکا) محاصره نه دي چې رحم پرې وکړي. ستاسې پوځ او ستا د بادار غرور، پاليسي، او نړيوال سياست د طالبانو لخوا محاصره دى. لکه څرنګه چې یې په میدان وردګو ولايت کې لس پوستې ستا له پوځه نيولې او پوځيانو دې ورته په خپله خوښه ځانونه او په پوستو کې ټول مهمات تسليم کړي دي، دا ډول ستاسې او ستاسې د بادار (امريکا لس ډوله سياست) د طالبانو لخوا محاصره دى. پر طالبانو غږ وکړئ چې پر موږ رحم وکړئ.
په ارګ کې د دوه درځنه مشاورينو په منځ کې راګير ولسمشره! له ملګرو ملتونو وغواړه چې نور په افغانستان کې د امريکا او د هغوی د اشرباڼو يرغل ته خاتمه ورکړئ څو ځان او په ډالرو رانيول شوي ياران دې له سياسي، ذهني، جسمي او فکري محاصرې وژغورل شي.
ولسمشره! مه پخپله له طالبانو د رحم غوښته کوه او نه دې ستا د سولې شورا او کاروانونه له ملګرو ملتونو غواړي چې پر ګاونډيانو دې سولې ته په همکارۍ او پر طالبانو دې فشار راوړي څو سولې او مذاکراتو ته غاړه کښېږدي.
طالبان بې د چا له فشاره سوله غواړي او سوله کوي – خو هغه سوله چې د افغانستان د تېرو څلورو لسيزو د مقدس جهاد اميدونه او ارزښتونه تر پښو پکې لاندې نه شي، هغه سوله چې افغانان یې د خپلو قربانيو په نتيجه کې غواړي، هغه سوله چې پکې د افغانستان ارضي تماميت، کامله ازادي، سل په سلو کې د اسلامي قوانينو نفاذ او د شهيدانو قربانۍ په نظر کې ونیول شي.
ولسمشره، د طالبانو پر ځاى غوره دا ده چې د ځان او خپل پوځ لپاره رحم وغواړئ څو له هراړخيزې محاصرې وژغورل شئ .
