(کابل ټکی کام، ۱۳۹۷، چنګاښ ۹) د ترکيي چارواکي وايي، د امريکا يا بل هېواد په غوښتنه به له ایران سره سوداګريزې اړيکې پرې نه کړي.
ويل کېږي، د روان کال په نومبر مياشت کې د لويديځو قوتونو او تهران تر منځ له اتومي هوکړې د امریکا تر وتلو وروسته امريکا يوځل بيا په تهران بندیزونه پيلوي.
د ترکيې د بهرنيو چارو وزیر جاويش اوغلو يادو بنديزونو ته په اشارې ويلي: “ترکيه د هیچا په ګټه له ايران سره سوداګريزې اړيکې نه پرې کوي” چې (اشاره يې امريکا ته ده).
اوغلو زياتوي، چې هېواد يې د هر ډول ټيکاو په راوستلو کې د امريکا تر شاه ولاړ دی خو هره پريکړه يې نه مني.
نوموړی زیاتوي، د ایران او ترکيې اقتصادي اړيکې او ګټې سره تړلي دي، د دې لپاره چې د يوه بل هېواد غوښتنه ده هيڅکله به دغه اړيکې پرې نه کړو.
ترکيه چې په سيمه کې د ناټو ملاتړی هېواد دی، نږدې پنځوس سلنه نفت له ايران څخه واردوي.
اوسمهال د ترکيې او ایران تر منځ تر لس ميليارده ډالره پورې سوداګريز توکي تبادله کېږي، خو څو ورځې مخکې د ترکيې ولسمشر رجب طیب اردوغان وويل، هېواد يې غواړي له ایران سره سوداګريزه راکړه ورکړه تر دېرش ميليارده ډالره ته لوړه کړي.
