په جده کې د امریکايي اشغال په ملاتړ د جوړې شوې غونډې وروسته ډېرو خلکو له طالبانو هیله وکړه، چې نوره جگړه پرېږدي او د ذالالت ډک ژوند غوره کړي. ځکه د کعبې امام فتوا ورکړې، چې د طالبانو جگړه ناروا ده. خو په دغه غونډه کې راټولو شویو مفتیانو د بمونو د مور، د بمبار، زندان، وژلو او بېعزته کولو هېڅ فتوا ورنه کړه او نه امریکایانو ته وویل، چې تاسې په کوم حق په افغانستان کې جگړه کوئ او هغه څوک چې ستاسې پر ضد جگړه کوي، تاسې نه غواړي او د خپل هېواد خپلواکي غواړي تاسې پرې داسې د بادارۍ او غلامۍ وخت راوستی دی؟
پرون یو لیکوال لیکلي وو، «د سعودي په خوله روژه نیسو، اختر د سعودي په خوله کوو، نو ولې یې فتوا ونه منو.؟» په سعودي کې د محمد بن سلمان د ولیعهد کېدو وروسته په دغه هېواد کې هره ورځ نوي بدلونونه راځي. په سعودي کې د قطو«پرو» د ښځو موټر چلولو، د سینما او حتا د فحاشۍ نوې څپه رالوتې؛ نو اوس به موږ هم دغه کارونه کوو او یا به یې منو؟ هېڅکله نه؛ ځکه اسلام جامع دین دی او په اسلام کې د بدلونونو راوستونکي الله جل جلاله په دواړو دنیاوو شرمولي او د ذلت ډک مرګ یې هم ورکړی دی.
زه کله – کله بېخي حیران پاتې شم. دلته په هره غونډه، پرلت او افتاء کې د طالبانو پر ضد خبره کېږي؛ خو د امریکا مازې یادونه هم نه کوي. امریکا د افغانستان د تېر اوولس کلن ناورین اصلي عامله ده. جگړه امریکا پیل کړې او پر موږ افغانانو یې یو گوډاگی نظام واکمن کړی، چې د امریکا پر وړاندې سپوڼ هم نه شي کولی او هره ناروا یې په پټو سترگو مني. خو څوک چې دغه ډول د ذالالت ډک ژوند نه غواړي، د افغانستان خپلواکي غواړي، افغانستان په هر لحاظ یو باثباته او ځواب ویوونکي خلک پرې حاکم کول غواړي د هغوی پر ضد فتوا ورکول کېږي او د تسلیمۍ وړاندیزونه ورته کېږي.
په تېره یوه اوونۍ کې د امریکايي او افغان گوډاگي پوځ له لوري د ننگرهار، لوگر، پکتیا، تخار، هلمند او په نورو ولایتونو کې تر ۱۵۰ ډېر ملکي وگړي شهیدان شوي، چې په شهیدان شویو کې ماشومان، ښځې، سپین ږیري او تي خوري ماشومان هم دي. خو د گډ حکومت چارواکي بیا دې خوشحاله دي، چې ناټو له افغان پوځ سره شل میلیارده ډالر مرسته کړې او په دغه خیراتي پیسو به نور څومره خلک ووژل شي او څو کلي به له خاورو سره خاورې شي؟
که د طالبانو پر ضد د نړۍ په هر گوټ کې غونډې جوړې شي او د امریکایانو پر ضد خبره په کې نه وي، نو ذره گټه هم نه کوي. د یوه امریکايي اشغالگر په موجودیت کې د طالبانو روانه جگړه سپېڅلی جهاد دی او دغه فتوا د نړۍ ټول حق ویونکي علماء ورکوي. خو د هغو علماوو به څه حال وي، چې پرون د زرمت له پېښې خبر وي او بیا به له خولې سپوڼ نه شي ایستلی؟
میږي ته چې الله جل جلاله په قهر شي، نو وزورنه ورکړي. که لرې نه وي، نو په نږدې وخت کې به د دغه امریکايي نظام اخیرې شېبې راورسېږي؛ خو د هغو خلکو به وجدانونه په کوم عذاب اخته وي، چې پروني وحشت ته یې دلایل ویل او طالبان ګرم گڼل.
د الله جل جلاله عذابونه بېخي ډېر دي؛ خو الله جل جلاله دې وکړي، چې په دغه عذاب کې یوازې د امریکا او د هغوی پلویان غرق شي. ځکه دوی امریکا غواړي او خدای دې د دوی مرگ هم له امریکایانو سره یو ځای کړي، چې په اخیرت کې هم سره جلا نه شي.
