امریکايي چارواکو ویلي چې په باګرام هوايي ډګر کې د ګرجستاني پوځیانو یوه ډله د ۳۶۰۰ ډالرو په ارزښت د سوداګریزو توکو پر غلا تورنه شوې ده.
امریکایۍ سټارز اینډ سټرایپس ورځپاڼې نن (د زمري ۹مه) د امریکايي پوځي چارواکو له خولې ویلي، د ګرجستاني سرتېرو دې ډلې په باګرام هوايي ډګر کې دننه د پوځ او هوايي ځواکونو د تبادلې د یوه خدمت له پلورنځي د ۳۶۰۰ ډالرو په ارزښت توکي غلا کړي دي. د توکو نوعیت نه دی ښوول شوی.
په افغانستان کې د مېشتو امریکايي ځواکونو یوه ویاند، مارټين اوډونیل، ویلي چې تر غلا وروسته په دې اړه پلټنه او تحقیق پیل شو، چې پر ګرجستاني عسکرو د لګول شویو تورونو تصدیق پکې وشو.
اوډونیل وايي، د تحقیق پایلې په باګرام هوايي ډګر کې د مېشتو ګرجستاني پوځیانو استازو ته وسپارل شوې څو د خپل هېواد دفاع وزارت ته یې وسپاري.
بل خوا، د ګرجستان دفاع وزارت د یک شنبې په ورځ په یوه خبرپاڼه کې ویلي چې د غلا په دې قضیه کې څلور ګرجستاني پوځیان ښکېل دي.
په خبرپاڼه کې ویل شوي چې دا غلا ”څو ځله شوې“، او د څلورو ګرجستانیانو تر څنګ د نړیوالو ځواکونو نور غړي هم پکې ښکېل دي.
د ګرجستان دفاع وزارت پر دې پېښه خجالت څرګند کړی او ویلي یې دي چې د پوځي پرسونل انفرادي کړنې د ټولو ”سوله ساتو“ د کړنو استازولي نه کوي.
که څه هم ګرجستان د ناټو سازمان غړی هېواد نه دی، خو په افغانستان کې د نږدې ۸۸۵ سرتېرو په درلودلو سره څلورم هغه هېواد دی چې زیات سرتېري یې د ناټو ماموریت په چوکاټ کې دلته مېشت دي. ګرجستاني پوځیان په باګرام، کابل او مزارشریف کې مېشت دي.
دا هېواد په ۲۰۰۴ز کال کې په افغانستان کې د بهرنیو ځواکونو د اېتلاف غړی شو او، د .icasualties.org د شمېرو له مخې، تر دې دمه یې ۲۹ پوځيان په دې جګړه کې وژل شوي دي.
